كلمه راجل مش مجرد كلمه ولا عضلات ..لأ دى معانى ومواقف ...الراجل الحقيقى اللى بجد ميبانش وقت الشده بس لأ كمان بيبان فى التعاملات اليوميه..فى حاجات بسيطه أو مواقف ممكن تعتبر عاديه بس من وجهة نظرى هى دى اللى بتبين الراجل الحقيقى من ال....بلاش نغلط خلينا نقول الراجل النص نص....وبصراحه المواقف اللى بقابلها فى حياتى كتير وللأسف بقت منتشره كظاهره مرضيه ومنها التالى:لما نكون راكبين مترو او اوتوبيس وتطلع ست كبيره فى السن او واحده حامل وتلاقى شباب زى الفل قاعدين ومتنحين ومبيتحركوش...بصراحه انا دمى بيتحرق وبقوم وأقعد الست بس بديله حته دين بصه معناها( انت يابنى ادم ايه مفيش دم ولا بتستعبط ولا انت فعلا عبيط بالفطره) ولو انا مش قاعده وشوفت المنظر ده برضه مش بسكت باجى جنب اى حد شكله كويس كده واقوله او اقولها معلش اصل طنط تعبانه ممكن تقوملها فى ناس بتقوم بالادب وناس تانيه بتشتمنى او بتغلط فيا بس انا والله مش بزعل لان الاخلاق مش بتتباع دى حاجه كده بتتحس..وكمان لما نبقى داخلين من باب والمكان يعدى شخص واحد وتلاقى الراجل داخل زى ولا مؤاخده ال......ولا بلاش نغلط( أسكت يالسانى....بطل تنقط حبر ياقلمى)وسايب الست وراه وعادى جدا .
........وكمان لما الراجل يبقى فى مكان ما وشايف واحده شايله حاجات تقيله وهتقع من طولها من كتر ما الحاجات تقيله وهو فى البلالا ولا كأن واحد صاحبه قدامه فى تمرين اثقال (ده شويه وهيقولها عاش يا وحش عاش) ولما تلاقى راجل طول بعرض يقعد فى البيت ويخلى مراته تنزل تشتغل وتصرف عليه ..انا مش متخيله ازاى بيقبلها على نفسه بصراحه....عارفين انا قولت ايه فى الشخصيات دى(عجبت من زمن كثرت نساؤه.. ولم يعد هناك رجالا.. ترى الرجل جالسا والمراه تسلك فى كل اتجاه مجالا.. يراها تحمل اثقالا ولا يحرك بالا..صدقت ياشافعى انه ليس عيب الزمان انه عيبنا دون احد سوانا) ولما قولت كده رجاله كتير زعلوا منى وياريت كده بس لا هجونى بالالفاظ بس انا شايفه ان اللى انا بقوله صح مش غلط والحمد لله انا لا اخشى فى الحق لومه لائم علشان كده كتبت خاطره تانيه أرد بيها على كل حد غلط فيا بسبب المقوله الاولى(لن أندم على حرف خطه قلمى او شعر سطرته يدى،لن أحزن على نقد غيرى ولن انحنى أمام هجائهم لى ..لن أتوقف عن نسج حروفا ذهبيه تلمع بالقدوه المنسيه ..كلماتى ليست مثاليه لكن الحكمه مرئيه)
