محبت ♥ 사랑 ♥ प्यार ♥ Amor ♥ Aşk♥ Love ♥ الحب

♥   بصراحه بقى دى أول مره أتكلم فى الحب والرومانسيه والحوارات دى...لإن الدنيا بالنسبالى ملاهى كبيره وانا مقضياها ضحك ولعب... صحيح جسمى بيكبر لكن عقلى لسه جواه الطفله الصغيره اللى بتحب الحاجات الحلوه والعرايس والدباديب...على فكره دى مش تفاهه لإن كل واحد فينا جواه جانب طفولى ( بس انا عندى زياده حبتين تلاته أربعه ) بالنسبه بقى لموضوع الحب ... أنا مش هفتى ولا هعمل نفسى أسامه منير أنا  هقول رأيي بمنتهى الصراحه وأكيد بحترم أى حد يعارض الرأى ده...بصوا بقى أنا شايفه أن الحب موجود فى كل حاجه فى حياتنا ومش هصدعكم بقى وأقول انواعه لإنكم كلكم عارفينها وحافظينها ( إنت ماما وإنت بابا وإنت أنور وجدى وحوارات الافلام العربى القديمه دى)  صحيح أنا ماليش تجارب  ولا حبيت قبل كده ( ولا عايزه بصراحه ..يقطع الحب وسنينه مش سايب حد فى حاله)  بس قدرت أكون رأى بسيط من تجارب المحيطين وإن مفهوم الحب بيختلف تماماً بالنسبه للأولاد عن البنات... مش هقول كل البنات رومانسيين وكل الاولاد مش بيعرفوا يعبروا عن مشاعرهم..لأ لإن فى بنات كتير جداً بتحب بعقلها مش بقلبها  وأولاد كتير جداً بيعرفوا يعبروا عن مشاعرهم ورومانسيين جداً ( مش لازم  يكون نحنوح ومسبسب علشان يبقى رومانسى لأ ممكن يكون رومانسى بطريقه فيها رجوله )   وكمان أنا فعلاً إتأكدت من إن الولد  قلبه يساع أكتر من بنت فى نفس الوقت ويكون  بيحبهم كلهم من قلبه ( اللهم لا إعتراض...ربنا خلقهم كده..هنعمل إيه يعنى يابنات.. ياغلابه يانى يا مكسورين الجناح )  أما البنت فمستحيل  تحب أكتر من حد هو يادوب ولد واحد بيملى  قلبها وحياتها واللى يقول لأ فى بنات بتحب أكتر من ولد فى نفس الوقت ..هرد وأقوله لأ دى بتمثل وبتحور مش بتحب بجد ... وطبعاً زى ما كتير منكم حَب  برضه كتير منكم فارق وساب حبيبه أو حبيبته... أيا كانت الظروف  ومين ساب التانى فمسأله النسيان دى كدبه كبيره لإن محدش أبداً بينسى حب قديم ..ممكن تلهيه الدنيا بس عمره مابينسى أبداً وخصوصاً اول حب... يوووووووه صدعتكم انا عارفه بس الموضوع  طويل وممكن أعمله أجزاء علشان متزهقوش منى...بس فى حاجه لازم أقولها للبنات وبالذات طالبات الجامعه...الاّ وهى إن الشباب بيزهقوا بسرعه فمتبقيش نكديه يا حلوه وتكرهيه فى اليوم اللى عرفك فيه وبطلى زن كتير ومتخنقيهوش  وكمان فى نفس الوقت أنا مش ضد إنكم تحبوا بعض بس انا ضد إنكم تعملوا حاجه غلط أو تخبوا على اهلكم ..إيه المشكله إنكم تعرفوا أهلكم أنكم بتحبوا بعض طالما مبتعملوش حاجه غلط ويكون بعد التخرج فى إرتباط رسمى وهيجمعكم بيت واحد فى يوم من الأيام.. كمان أنا ضد إنكم تقضوها خروجات وتنفضوا للمحاضرات وكمان مسأله مسك الايدين والحوارات الفاشله دى بعيداً عن كونه حرام ... دايما بيقولوا الولد مبيتجوزش بنت صاحبها وده فعلا صح بس بيتجوز اللى بيحبها واللى يستأمنها على بيته وعياله  فى غيابه ..وكمان بيقولوا  الجوهره  الغاليه بتكون غاليه فى عيون الناس علشان محدش بيقدر يلمسها لكن الزجاج رخيص لإن الكل بيلمسه  وعلشان كده بيتكسر بسهوله  وفى الأخر أحب أقول ( حبيب ٌ تمادى فى العناد  وزاد هجراً بترك البلاد وترك ناراً تاكل فى الفؤاد  فوصل خبرى لأخر ركن فى البلاد وذاع صيتى بين العباد بمحبوبٍ قتله الهوى وصار قلبهُ رماد) ♥

The Queen

لقد عانيتُ منذ الطفوله...حُرمتُ من البهجه..عِشتُ أياماً

 قاسيه تنحنى لها الجِبال...ولكنى صمدت ورفعت رأسى  فى شموخ...ناضلت إلى أن غيرت الواقع المؤلم إلى عالم جديد أنا ملكتهُ.......I  have suffered since I was child and  was deprived from joy.I have been through tough days that can destroy mountains,but  I stood and raised my head with dignity.I struggled until I succeeded in transforming this painful reality into anew world I’m it’s queen.

Mgical world

      فى عالم سحرى مملوء بالبراءه والنقاء كان لقائنا الأول ...نسينا أعمارنا الحقيقيه...محينا كل القيود ....أزلنا كل الحواجز...صنعنا ذكريات لن تنمحى من  ذاكرتنا حتى الممات...بنينا صداقة من نوع خاص...ذلك النوع من الصداقات الذى يؤثر على الجانب الطفولى بداخلنا...كم من ضحكات صافيه أطلقناها سوياً!!! كم من حلوى تقاسمناها معاً!!! لقد حولنا هذا العالم الخيالى الى واقع فى قلوبنا الصغيره.(

In a magical world full of innocence and purity was our first meeting. We forgot our real ages, and broke barriers and restrictions. We made wonderful memories that would never be erased from our minds until death. We had a special kind of friendship which affected the inner childlike aspects of our characters. What a wonderful and pure laughter that we had together! What a huge amount of candy that we shared together! We had transformed this magical world into a real one in our little hearts.)

إسرائيلى وأفتخر

أنا بحب القراءه جدا وعلشان كده عندى 3  مكتبات فوق بعض هيقعوا من كتر الكتب .والله حاسه ان الرفوف هتنطق من الحمل وتقول: أبوس إيديكى أرحمى اللى جابونى ....ده غير إنى بزود المكتبه كل سنه بعد معرض الكتاب اللى بحوشله من قبلها بشهور ولما بييجى بصرف فيه ولا الست لما بتصرف فى محل الفساتين زى المجنونه....من كام يوم ببص كده لقيت منظر المكتبه اللى تحت مش مظبوط وعايز يترتب ..وفعلاً بدأت أنزّل الكتب اللى فيه وبالصدفه لقيت منشور صادر عن مركز الإستعلامات الإسرائيلى سنة 1979 ( بقلم يعيل جلعدى)   وكان عنوان المنشور [ تأريخ إسرائيل ] انا فاكره انى كنت قريته من كام سنه فاتوا وساعتها سألت ماما وبابا ده بتاع مين!!! قالولى مش عارفين بس إحتمال يكون إتنقل مع الكتب اللى جت من مكتبة جدك الله يرحمه..المهم بقى قدرت  أقرأ المنشور ده مره تانيه بس بتمعن وحاولت إنى ألخص إسرائيل فى عيون اليهود عامله إزاى وبتمثلهم إيه...وفعلاً فى كذا نقطه وقفت عندهم وانا بقرأ ومنهم ::: أن اليهود عندهم قناعه ثابته بأنهم شعب الله المختار وإن دمهم أنقى وأسمى من كل الأجناس التانيه وبعدها بيتكلموا عن إن إسرائيل مش مجرد وطن جمعهم بعد سنين كتير من الفراق لأ ده ليه مكانه فى قلوبهم أعلى من كده بكتير...وبيركزوا على نقطه الهيكل وأن نبوخذ نصر دمره سنه 586 ق.م ومستشهدين بآيه  وهى [وبكى موسى فى الصباح وصعد إلى جبل سيناء كما أمره الرب.وأخذ فى يده لوحى الحجر]  (الخروج 4:43)  .... وآيه تانيه [على أنهار بابل ، هناك جلسنا..بكينا... ايضا عندما تذكرنا صهيون] ( المزامير 1:137) وكمان مكتوب إن بعد 50 سنه قورش هزم البابليين ورجع اليهود للقدس  وبنوا الهيكل مره تانيه.وفى سنه 70 ق.م الإمبراطور الرومانى تيتوس دمر  الهيكل تانى وبعدها بناه هيرودس واللى باقى منه ليومنا هو حائط المبكى اللى بالنسبه ليهم مش مجرد حائط لأ ده رمز للوحده الوطنيه والدينيه لليهود ...وبعدها اتنقل المنشور لنقطة تشتتهم فى الأرض وحرصهم على إقامه شعائرهم الدينيه وتعليم أولادهم اللغه العبريه وكان دستورهم التوراه وجنبه التلمود ...وطبعا بيشيروا للعرب هنا وحكمهم للقدس فى الوقت ده على أنهم أجانب أحتلوا بلادهم وخربوها  هما والعثمانيين وانه بعد المؤتمر الصهيونى الأول فى سويسرا سنة 1897 بقوا قوه لا يستهان بها ..وفى سنة 1917 كان وعد وزير خارجية بريطانيا اللورد بلفور بتأييد الشعب اليهودى وتشجيع إقامه دوله صهيونيه فى القدس وطبعاً مبينين أنهم ملايكه وحاولوا يعيشوا مع جيرانهم العرب فى سلام ( كذابين طبعاً) وبيقولوا أنهم أخدوا أرض على المشاع مساحتها حوالى ربع فلسطين( ياراجل ربع فلسطين على المشاع لأ وسعت منك ياعم الحج) إلا إن جماعه مترطفه بقيادة مفتى القدس رفضت الإعتراف بيهم وبملكيتهم  للأرض ( ينصر دينهم  والله جدعان قال متطرفين قال !!أومال أنتوا إيه إن شاء الله يا بابا إنت) وللمره الألف بتدّخل بريطانيا مناخيرها فى اللى ملهاش فيه وتطوعت وقسمت فلسطين ورسمت حدود الدولتين( وهى بريطانيا مال أهلها دى ولا بلدها ولا أرضها إيه اللى حشرها فى الحوار!!) وطبعاً منسيوش يتكلموا عن هتلر وجايبين صورة طفل يهودى رافع إيده وكاتبين تحتها( مجرم لكونه يهودى..بموجب احكام الإحتلال النازى)   طبعاً ده إستدرار لعطف القارىء وإسلوب غير مباشر لإجبار القارىء على التعاطف معاهم وذم هتلر ونعته بالطاغيه..وبعدها قلبوا على بريطانيا لإنها حددت تدفقهم لفلسطين بعد تحسين علاقتها بالعرب ( بريطانيا بتتلون زى الحيه) وهنا إعترف الكاتب إنهم هاجروا بطرق غير شرعيه (إمسك يا معلم..أهو وجودهم فى فلسطين غير شرعى من أساسه) وفى يوم 14\مايو\ 1948 اعلن دافيد بن غوريون تأسيس دولة إسرائيل وبدا يهاجر ليها اليهود من كل أنحاء العالم مستندين بآيه بتقول [ وأخرجهم من بين الشعوب...واجمعهم من الأراضى وآتى بهم إلى أرضهم] ( يحزقيل 13:34) ومنسيوش يبينوا إن مساحة الوطن العربى أضعاف اضعافهم وإننا مفتريين وأولاد لذينه ( هو العبره بالعدد ولا العتاد دانتوا فيكوا لئم يكفى الكون كله يا ولاد ال.....ولا بلاش شتيمه ميستاهلوش إنى أرتكب حرمانيه عليهم.. والمهم يا جدع إنهم واكلين إقتصاد العالم كله وسوق الدهب فى جيبهم الصغير) وكمان مبينين إن إسرائيل ينضرب بيها المثل فى الديمقراطيه والمساواه والعداله الإجتماعيه( أومال  ليه فى مظاهرات عندكم يا حلوين والتظاهرين بيهتفوا ويقولوا ...يانتنياهو كفايه تبذير إحنا بقينا شعب فقير ..وكمان بيقولوا حط الشيكل فوق الشيكل تبنى تعلى قصور من نيكل) ( يلا يا بخلا بطلوا عفانه وشح)...انا شايفه انهم لخصوا تاريخهم فى منشور احب اقول لعم  يعيل اللى كتب المنشور ده إحنا العرب ميكفيناش كتب التاريخ كلها علشان نقول تاريخنا النضيف المشرف مش حته منشور قد ده...( ملحوظه  كان مكتوب فى المنشور اورشليم بدل القدس بس انا لإنى مش معترفه بأورشليم ولا إسرائيل كدوله كتبتها كلها القدس )

الأم

بصوا بقى أنا عايزه أتكلم عن الأم الناجحه ..مش هقول التضحيه والحنان والكلام ده...لالالالا الكلام ده كلنا عارفينه وحافظينه...أنا هتكلم فى حاجه انا شايفه انها هى اللى بتحدد اذا كانت الأم دى ناجحه أو فاشله وخاصة لو عندها بنت....هتقولولى اشمعنى بنت يعنى!!!  هقولكم الصبر جميل بس انا اصلى لازم احط مقدمه كده فى أول الكلام ( أصلى بموت فى الرغى..عادى يعنى زى كل البنات) المهم بقى ..الحاجه اللى تخلى الأم من وجهة نظرى ناجحه هى علاقتها ببنتها .. يعنى الأم اللى مصاحبه بنتها لدرجة ان البنت متخبيش أى حاجه على مامتها مهما كانت الحاجه دى سواء حاجه غلط البنت عملتها او أى حاجه حصلتلها فى الحياه عموما او مشكله معينه البنت واجهتها...وهنا بيبان نجاح الأم فى خلق جسر من الثقه مع البنت بحيث أن البنت تحكى كل اللى فى قلبها لأمها من غير ماتكون خايفه او قلقانه وكمان من غير ماتحس أن فى فرق فى السن وان أمها مش هتفهمها...وعلى فكره العلاقه دى مش بتتبنى فى يوم وليله..لأ ده مجهود الأم على مدار سنين بتبدأه وبنتها طفله صغيره...فمثلا لما ترجع البنت من المدرسه تسألها يومها كان عامل ازاى  لحد ما البنت تبقى فى الجامعه وساعتها هتيجى تلقائى من نفسها   تحكى لمامتها  مش  لصاحبتها..لانه مهمت بلغت خبرة صاحبتها أو تجربتها فى موقف او مشكله معينه مش هتكون ربع خبرة الأم....طبعا الكلام ده كله قبل الجواز لان البنت بعد الجواز بيبقى سرها مع جوزها لانه سندها ونصها التانى..يعنى مينفعش انها بعد الجواز تسيح لنفسها وبيتها وتقول لمامتها كل تفصيله فى حياتها اليوميه لانها كده هتبقى بتخنق جوزها لانه هيحس انه مفضوح او مش قادر يأتمنها على حاجه لانها هتروح تقولها لمامتها على طول...و اكيد طبعا مفيش راجل هيحب الشعور ده...وعلى نفس القاعده علاقه الأب بأبنه ..فالأب لازم يحتوى ابنه ويصاحبه بس انا حبيت أركز على الأم وبنتها لان للاسف لقيت ان امهات كتير فشلوا فى الجزئيه دى...وفى الأخر فى مقوله سمعتها من دكتوره عزيزه على قلبى وعلقت جدا معايا  الآ وهى( الأم عماد البيت اذا صلحت صلح البيت)