Saturday, June 30, 2012

التشتت الدينى


على فكرة العنوان مش غلط أنا أقصد فعلاً التشتت الدينى وليس التشدد الدينى . فالتشدد الدينى ناتج عن تششت فكرى وجهل بأصول الدين ، كان نفسى أكون مُلمة بكافة أنواع التعصب ، سواء كان التعصب ده سببه إختلاف العرق أو النوع أو العقيده أو المذهب أو أى حاجه تانيه محل إختلاف فى وجهات النظر ، بس للأسف مش هدعى العلم وأقول إنى أقدر أكتب فى كل المواضيع دى ، بس هحاول على الأقل أسلط الضوء على ظاهرة بنحاول نخفيها ونداريها وننكر وجودها فى مجتمعنا وخاصة فى ظل سطوع نجم التيارات الإسلامية على الساحه السياسيه . هتكلم بصراحه وبوضوح ، أيوه فى عنصرية ، أيوه فى تشدد دينى ، أيوه النفوس مش صافية ، أنا هتكلم بصفتى مسلمة من أهل السنة وأتّبع المذهب الحنفى ، أنا هتكلم بصفتى مواطنة مصرية بتعيش فى مجتمع فيه أغلبيه مسلمه وأقليه مسيحيه . مش هقول زى أقباط المهجر مابيقولوا  إن المسيحيين فى مصر مُضطهدين لإن ماشاء الله ليهم نسبة مشاركه لا بأس بها فى الإقتصاد المصرى وأكبر مثال مجموعة الشركات المملوكه لعائلة ساويرس وكمان سوق الذهب اللى مسيطر عليه المسيحيين .بس نتكلم بصراحة بقى المسيحيين بيواجهوا صعوبات كتيره فى حياتهم اليومية ، أى بنت مش محجبة أو لابسه صليب لازم تسمعلها كلمتين ملهومش أى لازمه وهى ماشيه فى الشارع من واحد أو واحدة ميعرفوش أصول دينهم عن حق ،  والكنائس اللى بتتعرض للأذى ، يعنى لو حد قرب ناحية المسجد بالشر هتكون مبسوط ولا هتموته وهو واقف مكانه ،  وحاجات تانية كتير جداً مع الأسف بيتعرضوا ليها ... حط نفسك مكانهم لما يشوفوا المسلمين بيعملوا معاهم كده هتكون فكرتهم عن الإسلام إيه ! طبعاً فكره سيئه للغايه . نفسى الشباب يفهم إن كلمة مسلم دى مش معناها الأركان الخمسة للإسلام وخلاص ، المسلم الحقيقى هو السفير الجيد لدينه فى كل الأوقات وفى كل الأماكن ، المسلم الحقيقى هو المسلم اللى من غير مايتكلم سلوكه بيعبر عن دينه وعن شخصيته  ، المسلم الحقيقى هو اللى قبل ما يتكلم او يصدر منه أى سلوك يحسب العواقب اللى ممكن تحصل ، المسلم الحقيقى هو اللى يعرف أن سيدنا محمد (ص) قال ( إنكم ستفتحون ارضا يذكر فيها القيراط فاستوصوا باهلها خيراً فان لهم ذمة ورحما ). وطبعاً أهل مصر فى الوقت ده كانوا أغلبهم من الأقباط. المسلم الحقيقى هو اللى يعرف إن ربنا قال فى القرآن                                      
بسم الله الرحمن الرحيم
لَتَجِدَنَّ أَشَدَّ النَّاسِ عَدَاوَةً لِّلَّذِينَ آمَنُواْ الْيَهُودَ وَالَّذِينَ أَشْرَكُواْ وَلَتَجِدَنَّ أَقْرَبَهُمْ مَّوَدَّةً لِّلَّذِينَ آمَنُواْ الَّذِينَ قَالُواْ إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لاَ يَسْتَكْبِرُونَ وَإِذَا سَمِعُواْ مَا أُنزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُواْ مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ
وَمَا لَنَا لاَ نُؤْمِنُ بِاللَّهِ وَمَا جَاءَنَا مِنَ الْحَقِّ وَنَطْمَعُ أَن يُدْخِلَنَا رَبُّنَا مَعَ الْقَوْمِ الصَّالِحِين
فَأَثَابَهُمُ اللَّهُ بِمَا قَالُواْ جَنَّاتٍ تَجْرِي مِن تَحْتِهَا الأَنْهَارُ خَالِدِينَ فِيهَا وَذَلِكَ جَزَاء الْمُحْسِنِينَ
وَالَّذِينَ كَفَرُواْ وَكَذَّبُواْ بِآيَاتِنَا أُوْلَئِكَ أَصْحَابُ الْجَحِيمِ
صدق الله العظيم
سورة المائدة الجزء السابع  .
المسلم الحقيقى هو اللى يعرف إن السورة الوحيده فى القرآن اللى بإسم سيدة كانت بإسم السيدة مريم العذراء ، المسلم الحقيقى هو اللى يعرف إن السيده الوحيده اللى ربنا كّرمها ورفعها لمنزلة الأنبياء هى السيدة مريم العذراء ، المسلم الحقيقى هو اللى يعرف إن السيدة العذراء والمسيح شرفوا مصر بخطواتهم المباركة فى الرحلة المقدسه ، المسلم الحقيقى هو اللى يعرف إن سيدنا عمرو بن العاص لما فتح مصر ألغى الضرائب اللى كان بيفرضها الروم على المسيحيين فى مصر ولم يجبر أحد على الدخول فى الإسلام وفرض جزيه بسيطه جداً على اللى هيفضل منهم على دينه وكمان بعت رسالة لبطريرك الأقباط الأرثوذكس بنيامين  اللى كان هربان من ظلم القيصر وطلب منه إنه يرجع علشان يتولى زمام الكنيسة . المسلم الحقيقى هو اللى يحترم حرية الآخر سواء حرية العقيدة أو ممارسة الشعائر او حتى حرية المظهر . المسلم الحقيقى هو المسلم المعتدل المتفقه فى دينه ، المسلم الحقيقى هو المسلم اللى يتبع سنة الحبيب المصطفى ويطبق شرع الله بما يرضى الله وليس بما يرضى نفسه وغروره .



ياموحدين بالله ، عندى سؤال لـــيــــكـــــم
جاوبوه لوجه الله ،  يهدينا يــهـديـكــــــــم
الحزن إيه طايفته والدمع إيــه مـلــتــــــه
ده القلب يوم ما يموت تسمع أنين وحدته
والحق لما يضيع تلمس آهات صرختــه
ما الدم هو الدم رغم إختلاف هيئتــــــه

Thursday, June 28, 2012

مناجاة

يارب عيسى  والنبى محــــمــد ** أنت الملاذ وفى حماك خلاصى 
مالى سواك لأشكو قلة حيلـــــتى** فأنا العليل وفى رضاك دوائــى  
القـــــلب ينــــــزف داميــــــــــاً ** والعين تدمع بإرتكاب معاصــى
    فأنا الذليل طرقت بابك خاشعاً ** طمعاً فى عفو يكون منه صلاحى

Sunday, June 24, 2012

الرأى والرأى الآخر

إنجز يا سلطان ، إخلص يا فندم ، ها ! أيوه ! هيقول أهوه ! ياريتك ماقلت ياسلطان ، مع كامل إحترامى لجماعة الأخوان المسلمين بس أنا  كان صوتى لشفيق ( على فكره اللى هيبدأ يقولى إنتى فلول والكلام اللى ملوش أى لازمه ده ، أحب أعرفكم إنى نزلت التحرير فى القوافل الطبيه بعد موقعة الجمل والحمد لله ساهمت مع شباب محترمين فى إسعاف المرضى ) صوتى كان فى المرحله الأولى للسيد المحترم حمدين صباحى وفى الإعاده كان لشفيق مش حباً فيه ولا إيماناً ببرنامجه الإنتخابى ولكت تخويناً وعدم ثقه فى الإخوان المسلمين.. أنا من قبل الثورة وأنا كان ليا تحفظات على الجماعه وزادت التحفظات دى بسبب حاجات كتير ومنها على سبيل المثال لا الحصر نقض العهود والتراجع فى القرارات ( قالوا عند تشكيل مجلس الشعب لن نكون أكثريه وتجاوزت مقاعد حزب الحرية والعدالة أكثر من نصف المجلس ، قالوا لن يمثلنا مرشح فى إنتخابات الرئاسه ، ثم طل علينا المهندس خيرت الشاطر ومن بعده د\ محمد مرسى ) الحمد لله على نعمة الإسلام والحمد لله إنى أعرف حديث نبوى بيقول (عن أبي هريرة رضي الله عنه ، أن رسول الله صلى الله عليه وسلم قال‏:‏ ‏"‏آية المنافق ثلاث‏:‏ إذا حدث كذب، وإذا وعد أخلف، وإذا اؤتمن خان‏"‏ ‏(‏‏(‏متفق عليه‏)‏‏)‏ ‏.‏ 
زاد في ‏(‏‏(‏رواية لمسلم‏)‏‏)‏‏:‏ ‏"‏وإن صام وصلى وزعم أنه مسلم‏"‏‏.‏ 
وعن عبد الله بن عمرو بن العاص رضي الله عنهما، أن رسول الله صلى الله عليه وسلم قال‏:‏ ‏"‏أربع من كن فيه كان منافقا خالصاً‏.‏ ومن كانت فيه خصلة منهن كانت فيه خصلة من النفاق حتى يدعها ‏:‏ إذا اؤتمن خان ، وإذا حدث كذب، وإذا عاهد غدر، وإذا خاصم فجر‏"‏‏(‏‏(‏متفق عليه‏)‏‏) )
أنا مش من حقى أتهم أى تيار أو أى جماعه بأى إتهام بس من حقى أعبر عن رأيي ومن واجبى أحترم رأى غيرى وكلامى ده موجهه لكل اللى بيكيل السباب والشتائم لباقى المرشحين وخاصة المرشح الخاسر شفيق ( برضه مش حباً فيه ولكن تطبيقاً لأداب وسلوكيات فن التحاور والنقاش بالإضافه للقيم الدينية والمجتمعيه اللى إتربينا عليها ) آه دكتور محمد مرسى كسب الإنتخابات مبروك لحضرتك بس إعرف إن مقاعد المعارضه زادت مقعد وهو مقعدى ..هحترم حضرتك علشان إنت الراعى وحقك علينا نحترمك ونقدرك ، لكن صدقنى أنا قاعده ومستنيه أى تقصير لإنى مش هسكت على المطالبه بحقى من تانى ، مبروك لحضرتك ولحزب الحرية والعدالة ، أنا بقول مبروك لإن هى دى ضريبة الديمقراطيه..يوم لما نزلت التحرير عاهدت نفسى قدام ربنا إنى هتحمل مسئولية قرارى بالمشاركه فى الثورة  وأى قرار هيٌصدر  طالماً يمثل رغبة الأغلبيه هقبله وهطبقه بصدر رحب... كان نفسى فى حاكم بمواصفات               خاصه  بس مش هحكم غير لما أشوف بعينى، بس نفسى أشارككم حلمى اللى كل أملى أشوفه بيتحقق قبل أموت.
  

مجد العروبه قد فنى
بيعت كرامته إنحنى
هل من دواء لدائـنا !
داء إنعدام وفائنــا
هل من مغامر بيننا !
يجمع حطام آمالنـا
هل من معيد لعزنــا !
مثل الفاروق  أميرنا
هل من حكيم يقودنـا !
يخفى يذيب قيودنـا
هل من ملبى للنـــــدا !
يأسر قلوباً بالفــدا

Saturday, June 23, 2012

حكايتنا

إكتب يا تاريخ وإشهد يازمـان
إبدأ حكايتنا بكان يا مكـــــــان
الشعب المصرى إتذل إتهــان
وكرامته بقت طى النسيـــــان
إكتب يا تاريخ وإشهد يازمـان
إرسم وش المصرى الغلبـــان
أبيض وأسود من غير آلــوان
صامت باهت قدر الإمكـــــان
إكتب يا تاريخ وإشهد يازمـان
إحكيلنا حكاية كل جـبــــــــان
إتنازل عن حقه كإنســـــــــان
ولأهله وناسه وأرضه ده خان
إكتب ياتاريخ وإشهد يازمــان
إنهى القصه وإمضى يافنـــان
ماهو دمى الحبر وأنا العنوان
والصبر فى قلبى ولا الإدمـان