نسيمات الصباح

هبت نسيمات الصباح فأنعشت أرواح بالوصال أضاءت

قناعة

أؤمن بأن قليلاً من العُزلة لن يضر، و هالة الصمت تضفى هيبة، و الصبر على الشدائد علاء فى المقام، و العشق رغم المسافات نضال، و تدليل قلوب أحبتنا فرض لا منة، أما نقاء الروح فهو السبيل الوحيد للنجاة.

الصباح الحلو

الصباح الحلو ميكملش من غير الحليب اللى بنقائه بيخفى مرارة القهوة ويلمس روحنا قبل لساننا 

smile emoticon

 بالظبط زى الناس المميزين فى حياتنا اللى وجودهم معانا بيهون أى صعب.

الدعاء العفوى

حتى وإن حاولت إنتقاء كلماتى وإدعاء الإتزان أمامهم، فدعائى لك بالغيب كان عفوياً .. وحده الله لن يلومنى على البوح بما فى قلبى...

الألعاب العقلية

 فى ناس كتير كتبوا مقالات وكتب وأبحاث عن الفروق بين طريقة تفكير الراجل والست ولعل من أشهر الكتب المتداوله كتاب Men are from Mars, Women are from Venus  ، وبما إنى مش متخصصة فمش هقول كلام علمى كبير بس هتكلم عن حاجه كتير من الرجاله ميعرفوهاش عن الستات.. الراجل فى العادة كائن رايق أو زى ما بيقولوا برنس فى نفسه كده، مش بيصدع نفسه وفى الغالب بيكره الدخول فى التفاصيل سواء سماعها أو سردها وده بيخليه مش بيستمتع بالألعاب العقلية اللى بتتفنن الست فى لعبها وكتير بيكون رد فعله عصبى أو لا مبالى وفقاً لشخصيته. لو الراجل بيفكر فى خط مستقيم فتأكد إن الست بتفكر فى منحنيات ،يعنى مثلاً من أشهر الالعاب العقلية اللى الست بتمارسها ضد الراجل هى لعبة الغيره لإثارة الإهتمام، فتلاقيها بتقول أنا متقدملى  9 عرسان منهم 3 ضباط و2 مهندسين و3 دكاتره وطيار( لازم الطيار علشان محدش يقول حاجه، وعلى فكره شايفاك ياللى جمعت الأرقام)، بعيداً عن مدى صدق روايتها من عدمه، هى كل اللى عايزاه إنها ترجع ثقتها فى نفسها اللى إتهزت لأى سبب من الأسباب بإنها تستفزه من خلال خلق منافسين ليه، لو الراجل عصبى فى العادة هيقولها "طيب ربنا يوفقك ويسعدك وانتى تستاهلى واحد احسن منى"، أما لو هادىء هيضحك ويقول لا مؤاخذه "اللى اخدته القارعه، تاخده أم الشعور".. مش ده الرد اللى هى مستنياه هى كل اللى عايزه كلمتين يطمنوها ويرجعوا ثقتها فى نفسها وده كان السبب الأساسى فى إنها بدأت اللعبة من الأول.. فى ألعاب عقلية كتيرغيرها وكل واحده ليها غرض  وأشهرها كلمة "حاضر" اللى الست بتقولها فى حاجه مش عايزه تعملها بس طاوعتك فيها.. ساعتها تاكد إنها هتاخد المقابل فى لعبة تفاوض على حاجه تانيه إنت رافضها . وغيرهم وغيرهم .. الخلاصة، إن الراجل عمره ما هيستمتع بالالعاب العقلية دى ولا هيفهم إزاى يتصرف معاها إلا بعد سنين كتير من العشرة  وفى المقابل لو فى اتنين ستات شافوا بعض لأول مره وواحده حاولت تلعب لعبة عقلية مع راجل فى وجود ست تانيه هى مجرد لحظات وهتفسر اللعبة والغرض منها، يعنى لو واحده حاولت تلعب اللعبة العقلية إياها بتاعت" أنا هنا هنا يا ابن الحلال" وفى ست تانيه موجوده، أول حاجه بتيجى فى مخها " ياربى.. إنتى مفضوحه قوى، ما تتقلى شويه" .. يا معشر النساء رفقاً بالرجال، مترهقهومش بألعاب عقلية  مملة جداً بالنسبالهم، عايزه منه حاجه قوليها زى ما هى من غير لف ودوران لإنه مش بيفهم غير الكلام اللى بيتقال بشكل مباشر...

وحدك أنت

حتى وإن شابهك من رأيته اليوم فى الشكل، فأقسم بروحك التى ليس لنقائها أربعين مثيل أننى لم أبتسم خلسه إلا إشتياقاً لك..

لا تقلق

لا تقلق من إنتظار الشخص المناسب، فبناء جسر متين يصمد أمام عواصف الدهر يحتاج لذوبان روحين هائمتين فى ملكوت العشق اللامتناهى.

ملل

اتقى ملل الصبور إذا زهق.

هدندشك

أنا: شكلنا مطولين مع بعض يا كبير، ايه مزهقتش منى...

حامل الدراع: ما إنتى اللى مفتريه وبتعملى حاجات لا سنك ولا لياقتك ولا وزنك يسمحوا بيها، ألبسى بقى.

أنا: إنت شمتان فيا طيب وربنا لربيك.

حامل الدراع: هتعملى إيه يعنى؟ أخرك تقلعينى وقت النوم ...

أنا: هشتغلك خرز وترتر و أدندنشك على الأخر، وميمنعش شويه وردات كروشية فوشيا هتليق على لونك الأزرق القمىء.. ده انا هعمل فيك عمايل، هتكرهك فى اليوم اللى قفشت فيه فى دراعى وحلفت ما تسيبوش..

‫#‏حوار_صباحى_مع_حامل_دراعى‬

‫#‏سيبونى_عليه‬
‫#‏لازم_أربيه‬

ولد صالح يدعو له

النهارده صادف وأنا بصلى الظهر فى مسجد السيدة زينب إن يكون فى صلاة جنازة وحصل موقف خلانى أبكى وأفتكر حديث سيدنا النبى " إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له" .. بعد صلاة الفرض كالعادة الإمام بيفكر الناس إزاى بنصلى صلاة الجنازة علشان اللى ناسى.. وبعدها فجاه لقينا إبن المتوفى أخد المايكروفون من الإمام وقال " ياريت اللى زعلان من أبويا يسامحه، واللى ليه حق عند أبويا أنا أسده بداله" وبعدها بكى بمنتهى الوجع والحرقه frown emoticon فكرت فى الحديث النبوى وإزاى الولد ده بار بوالده ودعيت ربنا إنى أكون باره بامى وأبويا زيه وإن ربنا يرزقنى زوج صالح وذرية صالحة على إيديهم مينقطعش عملى بعد ما أموت.. ربى لا تذرنى فرداً وأنت خير الوارثين ...

بسمة خجولة

كم أشتاق لبسمة خجولة أنت مصدرها.

إلى الأبد

لا أؤمن بيوم العشاق، ولا بأهمية تبادل الهدايا الغالية كوسيلة للتعبيرعن الحب، ولا تتواجد لدى  أدنى رغبة فى سماع إسطوانات العشق الغير واقعية بالمره، لا أحلم ببطل خيالى خارق القوى، وسيم الطلة، خالى من العيوب، متُباهى بحساباته المصرفية. لا أتمنى أن أكون بطلة نُسخة مُكررة من قصص الهيام التقليدية المنتشرة هنا وهناك. فقط أريده إنساناً نقياً يخطأ مثلى وينهار تحت وطأة الضغوط كما أنهار، يفشل كعادة البشر ولكن ينهض من جديد كعادتى، ينفجر عند التشبع بالطاقة السلبية ثم لا يستغرق سوى لحظات حتى يعاود الإبتسام إيماناً بالخير. يصبر على الإبتلاء ويحمد الله فى الضراء قبل السراء. والأهم من كل ذلك مهما طال بنا الزمان، وتغيرت ملامح وجهى وتجعدت إطلالتى يظل يرمقنى بتلك النظرة اللامعة ذات المغزى.. 

الإخفاقات المؤقتة

النهارده صحيت على خبر يصنف على إنه سىء فى قاموس ناس كتير، طريق سعيت فيه بمنتهى الإلتزام والجديه وفى نصه إتقفل فى وشى.. للوهلة الأولى قلبى إنقبض بس الموضوع إستغرق أقل من دقيقة علشان مخى يعمل حسابات الخطة البديلة، الغريب بقى إنى أدركت أن كله خطوه سعيتها فى الطريق ده كانت بتفتحلى سكه فى طريق تانى خالص ربنا مختاره ليا وأنا مش واخده بالى، كل مجهود كنت ببذله فى الطريق اللى انا رسماه لنفسى ده كانت نتايجه بتروح لطريق تاني خالص وأنا مش مُدركه.. أنا مش زعلانه،  الحمد لله عندى إحساس بالرضا والقناعة إن ربنا راضى عنى علشان كده حطنى على بداية طريق تانى هو اللى راسمه ليا.. كتير هيقولوا إنتى إنهزاميه ومع أول إخفاق فى الطريق مش هتعافرى وتحاولى تكملى، لأ خالص أصل محدش يقدر يعاند ربنا على فكره، أنا متاح ليا أعافر فى نفس الطريق اللى إتقفل فى وشى ومع الصبر وطول البال و مشيئة ربنا ممكن أحقق هدفى، بس لأ، أنا قررت أسعى فى الطريق اللى إختارهولى ربنا فى المرحلة دى من حياتى وممكن فى مرحلة تانية أرجع للهدف اللى متوفقتش فى تحقيقه، العبره مش بإنك متنهزمش، العبره بإنك ضهرك  لما ينحنى من العبء، تلحق نفسك قبل ما يتكسرعمودك الفقرى وتقلل الضغط وتستقيم فى سعيك.. الورقة دى هى الوقة اللى كان مكتوب عليها الهدف لإن من عادتى أكتب أهدافى وأفكر نفسى بيهم، أنا قطعتها مش غضب ولكن علشان متبقاش مصدرتشتيت فى الطريق الجديد، مش معنى إنى قطعتها إنى هرميها لأ هخليها محطوطه فى مكان جديد جنب مكان الاهداف وهسميه مكان الإخفاقات المؤقته، كل ما أحس إنى نجحت والغرور أو الكبر ممكن فى لحظة يدخلوا قلبى هشوف الورقة دى وأفتكر إنى زى ما نجحت ممكن أخفق والعبره مش بالوصول للقمة لأ بالمحافظة على وجودى فى القمة. 

وقفه حتميه

الصورة دى مر عليها 4 سنين، لسه فاكره اليوم ده كويس، كنت مرهقة جداً فى آخر أيامنا فى مكة قبل الرجوع للقاهرة ومع ذلك أصريت أقعد مع بابا فى الحرم ونوصل بين الصلوات بالعبادة من غير ما نرجع الفندق.. على الرغم من أنها مكانتش اول عمره لينا بس مع الأسف واجهنا فيها صعوبات كتير أغلبها كان بسبب شركة السياحة وسوء تنظيمها للرحلة.. أنا وبابا يومها إتكلمنا فى حاجات كتير ودعينا كتير ممكن اكون مش فاكرة كل التفاصيل بس اللى فاكراه كويس جداً كم المتعة اللى حسيت بيها يومها، مريت بلحظات من صفاء البال والنقاء الروحى تعتبر من أندر اللحظات اللى أى بنى أدم ممكن يمر بيها فى حياته كلها بدون مبالغة، راحة نفسية معاها بتنسى كل همومك وبتفضى دماغك، محدش بيوحشك، مبتقلقش من بكره، مبتزعلش على حاجه، مبتتمناش إن اللى إنت راسمه لنفسك يتحقق بسرعة، بتبقى كائن نقى لأقصى الحدود، بنى أدم شفاف روحه خفيفة وراضية.. مؤخراً أنا بفكر كتير وبحسب حسابات كتير وبعمل مليون خطة بديلة بسبب إن فى ظروف كتير مخليه كذا محور فى حياتى مش مستقر، كل يوم قبل ما أنام بمسك القلم والورقة وأكتب قائمة طويلة عريضة بالإلتزامات اللى لازم تخلص قبل نهاية اليوم اللى جاى ،كل يوم بصحى وأنا حاسه إنى مأخدتش كفايتى من النوم بسبب إنى حتى ساعات نومى بحسبها علشان متجيش على حساب إلتزام تانى.. أظن إنى مش لوحدى اللى بعمل كده، أغلب اللى فى سنى بيعملوا كده ولازم يعملوا كده علشان الهدف الأساسى من وجودنا هو إعمار الكون والسعى بشتى الطرق، محدش نفسه يموت وإسمه يموت معاه، محدش نفسه ميسبش وراه أثر علشان لما يموت عداد الحسنات ميوقفش ويفضل شغال، بس مع كل ده لازم وقفه، لازم استراحة، لازم من فترة للتانية نتأكد إن إحنا ماشيين فى السكة الصح والباطل مغطاش على الحق جوانا وإحنا مش واخدين بالنا، ربنا ينور بصيرتنا كلنا ويستخدمنا ولا يستبدلنا...

اللهم يسر لنا عمره عاجلاً وليس أجلاً

الشغف

فقدان الشغف أول خطوة على طريق الفشل.

سم الزرنيخ

هو: أتعلمين، هناك فتاة تلاحقنى، يبدو أنها معجبة بى.

هى: حقاًّ ! "إبتسامة غامضة" ، يا لحسن حظها..

هو: ماذا؟ الأ تغارين؟

هى: ولم أغار يا عزيزى و سوف تنعم تلك الفتاة  المحظوظة بحياة أبديه رائعة فى أقرب وقت.

هو: هل أنتى فى كامل قواكى العقلية؟

هى: أنا اليوم فى حالة إنتشاء لم أصل لها منذ زمن بعيد، فها أنت بمنتهى الرقة تقدم لى الفرصة الذهبية التى طالما أنتظرتها لإستخدام سم الزرنيخ السحرى الذى أحتفظ به منذ أحببتك، فيالسعد تلك الفتاة التى سوف تنعم بميته رومانسية أسطورية فى ريعان شبابها...

هاجر

وما الحب إلا هجرة. فها أنت تسافر هائماً خارج حدودك النفسية وتستقر داخل وطن جديد تشعر فيه بالأمان، إخبرنى ما الفرق بين ما تسلحت به لهجرتك الروحية وما يملكه إى مُسافر مُغامر أو رحال؟ أرى أن جواز سفرك الصدق وبطاقة مرورك الثقة وختم إقامتك الإخلاص وجنسيتك الإحترام ..  سافر، لاتخف ، غامر ، إعشق إلى حد الجنون ولا تهتم لأحد ، فقط هاجر ولا تعود..

عبادة الصبر

الصبر عبادة لا يحييها إلا من لديهم أحلام يرفضون الموت نفسياً أو جسدياً دون تحقيقها إن شاء المولى.

أحبوهم لأرواحهم

المال يفنى، الجمال لا يدوم، الوظائف تتبدل، المنازل تتهدم ..فإذا أحببتموهم، أحبوهم لأرواحهم لا لشىء أخر، فوحدها الروح النقية تبقى مضيئة للأبد، فإن حدث و خفت ضوئها يوماً ما، حاوطوها بأرواحكم فى حنان وسوف تنتعش وتقوى من جديد..

إشتياق

ليس كل البعد فراق، فبعض الصمت إشتياق ...

السكن

السلام على روح نقية صارت سكناً جدرانه بسمات وسقفه سابع السماوات ..

الإستقرار

الإستقرار بيمثلك إيه ؟ أعتقد الإجابة هتختلف من شخص للتانى .. فى حد هيجاوب وظيفة وحد تانى هيقول جواز وحد تالت هيقول أمان مادى وحد رابع هيقول ذرية صالحة وغيرها من الإجابات المختلفة واللى بتعكس التنوع فى الشخصيات.. خلينا نتفق أن الدراسة مهمة والشغل مهم والجواز مهم والأمان المادى مهم والسكن مهم والصحة مهمة بس الأهم منهم كلهم الرضا.. الإستقرار النفسى أهم مليون مره من الإستقرار المادى أو الوظيفى أو الدراسى أو أى نوع تانى من أنواع الإستقرار الملموس .. طيب هل الإستقرار النفسى يعنى إنى أوصل لمرحلة معينة وأحقق أحلامى وأقول خلاص كده انا أستكفيت سعى؟ لا خالص مش ده المقصود طول ما الواحد عايش وبيتنفس، لازم يسعى ويعافر ولما يحقق حلم معين يخلق حلم جديد وهدف أكبر ويحاول يوصله، بلاش يبقى طموحنا محدود وتفكيرنا سطحى.. الإستقرار النفسى هو السعى بروح راضيه، يعنى تسعى، ولو حققت هدفك تحمد ربنا أما بقى لو محققتوش فده سبب أقوى إنك تحمد ربنا إنه بعدك عن سكه مكانش فيها خير ليك وتحاول تخبط على باب حلم جديد وتسعى لهدف تانى لعل وعسى الخير يكون فيه.. الإستقرار هو بال رايق ونفس راضيه بيرتاحوا على المخده بليل فى منتهى السلام والأمان حتى ولو كان اليوم اللى مر فى منتهى القسوة والصعوبة وده ببساطة لإنهم واثقين إن بكره أحلى.

الروح الحلوة

مش كل حد شكله حلو، روحه حلوة.لما تحبوا، حبوا ناس روحهم حلوة، مش شكلهم حلو.. لما تختاروا أصدقائكم، إختاروا اللى شخصياتهم حلوة، أصل الشكل ده بعد كام سنة هيتغير واللى هيبقى هو الفكر والمبادىء والصحبة الصالحة اللى هتشدكم لقدام مش تجيبكم ورا ... 
‫#‏خواطر‬
‫#‏فكروا_بعقلكم_مش_بعينيكم‬

إنت مصدر قوتك

ربنا سندك، قلبك دليلك وعقلك هو سبيلك الوحيد للنجاة.

‫#‏انت_مصدر_قوتك‬

‫#‏مش_تنمية_مهلبية‬

المحاربات

وحدهن الساذجات هن اللواتى يتجرأن على أن يقحمن أنفسهن بين إمرأه محاربة ودرعها الصلب المتين بغرض الفصل والتفريق، فالمحاربات تجدن لغتين لا ثالث لهم ، لغة الصبر على الفضوليين السذج بالإضافة إلى لغة السيوف الدامية.. وفى الحالتين غير مسموح للمحاربات بالتخلى عن تلك الإبتسامة الهادئة لإنهن واثقات فى أنفسهن، فالعبره فى النهاية بمن يتمسك بالدرع بكل ما أوتى من قوة حتى الرمق الأخير.