الإنهيار الأبدى

مع كل سنة بتمر من عمرنا بيزيد خوفنا من التغيير، من المستقبل ، من الإرتباط ، من السفر، من الجنان ، من الخسارة، من الإنكسار، من الفشل ... ولما تيجى اللحظة اللى بنستسلم فيها لخوفنا ونبطل نقاوم ونتجرأ ونُقدم ونتشجع... بننهار للأبد...

العقل البشرى

معجزة العقل البشرى مستحيل نقدر نستوعبها بشكل كامل، ربنا خلقنا بعقول مُعقده جداً ونسب ذكاء مُتفاوته وإدراك ووعى بيتفاوت حتى بين التوأم المتماثل.. من أكتر الحاجات اللى بتبهرنى فى العقل الإنسانى هى الذاكره. ممكن نفتكر مئات الأسامى والاف الوشوش وملايين الروائح بس الأحاسيس والمشاعر هى الحاجه الوحيده اللى مع الوقت يا أما بتزيد حدتها بشكل كبير أو بتتلاشى تدريجياً .. أفتكر معايا أول يوم فقدت حد عزيز عليك أو مات إنسان قريب من قلبك، أكيد الدنيا إسودت فى عينيك و فكرت إن الحياة وقفت ومش ممكن تستمر من غير وجود الشخص ده، لكن فى الحقيقة مع مرور الأيام المشاغل بتلهيك وشده إحساسك بالوجع بتقل تدريجياً، مش بتنسى الشخص اللى مات بس بتنسى شويه بشويه إحساسك بالمرارة والوجع الشديد وبتندمج من تانى فى دوامة الحياة.. ممكن حته من روحك تتكسر أو تفقد جزء من مرحك وبهجتك بس أكيد مش هتبطل تضحك أو على الأقل تبتسم .. ربنا رحيم جداً وعلشان كده خلانا ننسى، ننسى الوجع والحزن، ننسى الحسرة والقهر، ننسى الندم وإلا كانت حياتنا هتبقى مستحيله وإحنا عايشين بنأنب نفسنا على ذنب إرتكبناه فى حق حد أو فى حق نفسنا فى يوم من الأيام.. ومن نفس المنظور الفرح كمان بننساه، الفرح مش سنين بنعيشها ولا أيام ولا حتى ساعات.. الفرح قصير، الفرح لحظات ولو معرفناش نستمتع بيها وقت لما تيجى هنبقى خسرنا كتير جداً، لو متعلمناش نفضى مكان  طاهر ونضيف ونقى جوه قلبنا  علشان نخزن فيه اللحظات الحلوه اللى بنعيشها، يبقى ضيعنا عمرنا من غير ما نعيش، أصل العيشة مش نفس طالع ونفس داخل وأكل وشرب وشغل بس، العيشة أمل وحلم وفرح وصبر، العيشة حلوة بس إحنا نفهم إن البسمة صدقة ونشر السعادة عبادة..

ملاكى الصغير

كلما ضممتها لصدرى ،احاطت ذراعيها حول رقبتى واستسلمت لقبلاتى على وجنتيها.. نستكن فى هدوء، فاشعر بدقات قلبها الصغير تداعب روحى برقة. اهمس فى اذنها "أحبك " ،فترد في ملائكية وبراءة "حبك" فانهار كليا واذوب هياما و عشقا .

الضياء المنتقص

وشوش القمر في عذوبة قائلا " أيا بدر التمام مال حسنك منتقص! أتراك مفتقد النجوم أم الونس! أو ربما تشتاق للوصل المتمم للسنا، كالعاشق الغرقان بنظرة قد نجا".

عيون الحبيب

هى : ساقتلها او ربما ساكتفى بتقطيع شعرها وعض ذراعيها لتكون عبرة لكل فتيات ونساء الكون. 
هو: من؟ لماذا؟ ماذا حدث؟
هى: أما أنت فسوف اكتفى بخزق إحدى عينيك الجميلتين.
هو: أنتى حقا مخيفة اليوم. هل انتى بخير؟ 
هى: ماذا؟ هل تتهمنى بالجنون الآن؟ يالك من مدعى للبراءة، هل تنكر انك ابتسمت اليوم لتلك الفتاة البغيضة التى تحاول دوما التودد إليك؟ هل تنكر انك رددت عليها التحية؟ هل تنكر انك كنت لطيفا مع غيرى؟ هل تنكر انك جرحت مشاعرى؟ هل تنكر انك بمجرد أن نظرت إليها خنتنى خيانة عظمى لا تغتفر؟ لن أقبل هذا أبدا.. ولما لا أبدا بك لاشفى غليلى. اقترب يا عزيزى لاتفقد جمال عينيك ولونهما البنى الساحر....
هو: "اختفى من المكان فى لمح البصر".

بسمة الامس

وجاءت الأمطار لتنعش أرواح خملت من ضباب الكآبة وغيوم اليأس، فما إن صفا القلب وإرتاح البال عاد نور الأمل يشق السماوات العُلا راسماً تلك البسمة المميزة التى أهديتنى إياها بالأمس فحولت ضعفى لقوة..

قهوة الموت

اشتريت نوع بن جديد وعملت فنجان النهاردة، ريحته مميزة جدا.. فكرتنى بذكريات غريبة لما كانت الفيلا مش بتتفتح غير لما يكون في عزاء ويتصلوا بعم حمدى الفراش علشان ييجى يقدم القهوة للناس اللى جايه تعزى. . قهوة النهاردة ريحتها نفس ريحه قهوة عم حمدى اللى كنت بشمها فى مطبخ الفيلا وانا رايحه اطلب منه يجيب مياه زياده للضيوف، قهوة النهاردة ريحتها حزن وموت وشوق لفيلا اتهدت وجدود ماتوا. أو يمكن انا بس اللى روحى مرهقه فقررت اشم ريحه الكآبة في قهوتى...

مدح الحبيب

فى الغالب لو حضرتك من جيل التمانينات وانت طالع للأسف مش هتعرف أغلب الأسامى دى "ياسين التهامى، العربى فرحان البلبيسى، سيد النقشبندى، أحمد التونى،محمود التهامى، محمد الكحلاوى، خضرة محمد خضر، جمالات شيحة، فاطمة سرحان".. للى ميعرفهومش دول مداحين النبى المجددين فى التراث الشعبى المصرى.. كل أغانيهم غزل ومدح فى سيدنا محمد صلى الله عليه وسلم وآل البيت، كلامهم فى العادة باللغة العامية علشان يوصل للفئة المستهدفة وهى فى العادة البسطاء من مرتادى الموالد الشعبية وحلقات الذكر الجماعية والمجالس الصوفية اللى بيسموها الحضرة.. كل مداح ليه إسلوب مميز ومختلف، يعنى أنا شخصياً بحب طريقة البلبيسى لإنه بيبدأ المدح بموال قصير بيتكلم عن الدنيا والناس وبعدها بيدخل فى المدح بإسلوب إنسيابى وموسيقى بالدفوف بتحرك القلوب بشوق لزيارة قبر سيدنا محمد فى المدينة المنورة .. فى ظل الإسفاف الكتير اللى حوالينا حاولوا تنضفوا ودانكم بحاجة بتعبر عن هويتنا وأصلنا وفى نفس الوقت بتعكس ديننا الوسطى ...

ملحوظات ختامية

و ستبقى دوما تلك الملحوظات الختامية المدمجة بين الأقواس هى أصدق انعكاس لما يدور في أنفسهم بعيدا عن المقدمات الطويلة والكلام المنمق.

كنوم الأطفال

كنت دايماً بستغرب ليه بيقولوا تمتعوا بنوم هادىء وعميق كنوم الأطفال، ما كلنا بننام عادى يعنى. . لما اليوم بيخلص ومن كتر الإرهاق اول ما بنحط راسنا على المخده بنسافر بسرعة، بس العبرة مش سرعة دخولك فى النوم بل درجة عمقة. انت مبتبقاش نايم كليا على فكرة، مخك شغال وبيفكر في مليون حاجة ... بتصحى كتير ونومك بيكون متقطع ، كل ساعتين تصحى تتقلب في السرير أو تشوف موبايلك تقوم تشرب مياه أو تدخل الحمام أو حتى تفضل مبحلق في السقف. ولما ييجى ميعاد صحيانك الصبح بقيت بتقاوم و مش عايز تصحى، مشبعتش نوم، حاسس انك مرهق مش قايم نشيط زى ما كنت زمان ... هو احنا ممكن نرجع زى زمان؟؟ننام بعمق! ! ولا مع كتر الأفكار والأهداف والخطط والهموم اللى شغلانا مستحيل نقدر نستمتع بالنوم كوسيلة للراحة لأن خلاص مبقاش في لا وقت ولا مجال لالتقاط الأنفاس!!!

وصال الروح

طوبى لأرواح تمسكت بالوصل دون مبالغة في القرب و لا مبالاة في البعد

تحرروا

نحن كتل متحركة من الأسرار والالغاز، بداخلنا عقول بلغت أقصى مراحل التعقيد والازدواجية وقلوب تهوى وترتفع وتنقبض وتنبسط و تميل وتعتدل لمجرد سماعها لكلمات بسيطة، وأرواح تسرق وترد وتحيا وتموت وتتألم وتفرح مع كل موقف نمر به .. اعشقوا بصدق وبقوة وبجنون ، حرروا انسانيتكم من القيود،تمردوا على الواقع، تطهروا من الخبث وأطلقوا العنان لبراءتكم الدفينة، استمتعوا فالحياة أقصر مما تتخيلون...

اقدر

وعندما  توقف عن السير في منتصف الطريق وصرخ "لم أعد أقدر " ، تردد صدى الصوت  فى ارجاء المكان بمنتهى القوة قائلا "أقدر، أقدر أقدر...."

خبث الرجال

هى: لا ترتدى القميص الأزرق لأنه يجعلك تبدو وسيما فوق العادة. 

هو:اذا سوف ارتدى الأبيض.

هى: حقا!  هل تخطط للزواج من امرأه أخرى!! لا قمصان بيضاء لليوم.

هو: لا بأس سوف ارتدى القميص الأحمر. 

هى: يالله!  هل تتعمد استفزازى، هل هو يوم العشاق وتنوى خيانتى مع احداهن أم ماذا ! ! لا ترتدى اللون الأحمر ما حييت.

هو:حسنا،  سوف ارتدى القميص الأسود، اراضية الآن؟ ؟

هى: انت بالفعل تخطط لقتلى بالسكتة القلبية، اللون الأسود يعطيك هيبه فتاكه تسحر الفتيات، لا لا لا أنسى اللون الأسود.

هو: أتعلمين، لقد قررت النزول إلى الشارع عاريا حتى أثبت واقع جنونى جراء غيرتك.

هى: يالخبث الرجال، تثير أعصابى بافعالك ثم فى النهاية تتهمنى بالغيرة...

مشاعر لا تترجم

 على فكرة مش كل حاجة إنت حاسس بيها لازم بالضرورة يكون ليها كلمة أو مصطلح لغوى علشان يعبر عنها، أوقات بسمة أو نظرة أو تكشيره  أو حتى دمعة  تقدر توصل المعنى أحسن من مليون كلمة .. يعنى مثلاً فى ناس لما بتجيب أخرك معاهم بتتجاهلهم تماماً لإن مهما إتكلمت مش هتلاقى وصف بيعبر عن إحتقارك ليهم وإزاى هما وقعوا من نظرك، ولما بتتظلم وتبكى من قهرتك، الوجع اللى بتبقى حاسس بيه، مهما قعدت تحكى عنه محدش هيحس بيه فعلاً إلا اللى إتظلم زيك، ولما بتفرح من قلبك، بسمة الرضا اللى بتكون مرسومة على وشك بتكون أغلى من أى حروف ممكن تقلل من قيمتها، ولما والدتك بتحضنك، الإحساس بالأمان اللى بيوصلك مستحيل تلاقى وصف ليه فى كل لغات العالم، ولما طفل بيبوسك بمنتهى البراءة، الزغزغة الخفيفة اللى بتحس بيها وبتطيرك فوق السحاب معتقدش إن فى حد يقدر يحكى عنها ويقول  إيه سرها، ولما بتحب حد بجد وتوصل لمرحلة إنسجام الأرواح والفهم بالنظرة والصمت الصاخب اللى كله أحاديث محدش فاهمها غيركم يبقى ولا مليون بيت شعر وقصيدة هيعبروا عن ذره واحده من حبك.

قلوب الرجال

خُلق الرجل بقلب كالبالونة مُصمم من أنسجة مطاطية يُمكنّه من أن يعجب بمئات الفتيات، فلا يحتاج أحدهم سوى دقائق معدودات حتى يرمق إحداهن بتلك النظرة اللامعة المتعارف عليها، ولكن هناك دوماً تلك المميزة التى تنجح فى إنتزاع قلبه من صدره بمنتهى القوة ،مُحدثة ثورة فى كيانه و تاركه بركان من الآلم بين ضلوعه.. ومهما حاول كبح جماح ألمه فإن أوجاعه لا تهدأ إلا حين تعتنى تلك الفتاة بالقلب الذى إستولت عليه وتحفظه دون أذى بين طيات روحها...

شريك الحياة

من خلال حديثى مع مجموعة من السيدات والبنات كنت دايما بسالهم خلال النقاش عن ايه اكتر حاجة انتى محتاجاها من شريك حياتك؟ الإجابات تنوعت بين الآتى : الأمان، السند،التقدير، الكلام الطيب،الإحترام،الاحتواء.
بالنسبة للرجاله لم تتاح ليا فرصة انى اسالهم فطبعا طبقت الشق الذكورى من تجربتي الاجتماعيةعلى الغلبان والمظلوم معى للأبد الحاج الوالد وكانت إجابته أن فى العاده الراجل بيبقى عايز شويه حاجات من شريكته منها: الصداقة، المصارحة،الاهتمام بالمظهر، التفهم، الذكاء.
فى حاجتين للأسف محدش قالهم بس انا شايفه انهم مهمين جدا للطرفين "الثقة و الحرية"...
الثقة لو فى لحظة اتهزت للأسف بيبقى صعب جدا جدا اعاده بناءها و الاستمرار في العلاقة هيكون مرهق نفسيا للطرفين، أما الحرية فمن غير المنطقى أبدا انك تخنق شريكك تحت مسمى الغيرة أو التحكم أو أى حاجه تانية تبرر لنفسك بيها تدخلك الزايد في المساحة الخاصة بشريكك واللى مش من حق اى حد غير ربنا أنه يكون على علم باللى بيدور فيها.مش معنى انك بتعز إنسان إنك تفرض رأيك دون نقاش أو حوار. مهما ارتبطوا ببعض احترموا مساحات بعض، سيبوا مجال للتنفس، صدقوني شويه مسافه مفيدة مش مضره...

الطريق إلى القمر

همست فى خوف "الظلام حالك، والطريق إلى القمر طويل" فما كان منه إلا أن إبتسم في دفء قائلا "وان طال الدرب واشتد الظلام، فكفى بنور قلوب المحبين دليلا ".

شيم الكرام

الإذن من شــــيــــم الـــكــــرام ذوى الأدب 

الشاكرين لغيرهم، حتى وإن صَغُر السبب

صدقاتهم بسمات فاقت برونقهــا الـــذهب

إن أخطأوا يتأسفون بلا عِناد ولا هــرب

حلاوة الصبر

كذبوا حين قالوا يفنى العمر فى الإنتظار، فما اروع الصبر حين ينتهى بلقاء أرواح مميزة لا تكتفي باحتواءنا فى الدنيا بل ترافقنا إلى الحياة الأبدية حيث السعادة اللامتناهية...

أسلحة المرأة

أسلحة المرأة على المستوى العاطفى تتنوع بين دموع للاستعطاف ودلال لتلبية الامانى وصمت للتعبير عن الحب العميق أو اللامبالاة وفقد الثقة و غيرة لحماية شريكها وتجديد ثقتها في نفسها، أما على المستوى المهنى فادعاء الغباء لجمع المعلومات والصمت لتحليل المعطيات وكثرة الأسئلة لتاكيد اجابات تعملها بالفعل والكلام الرزين لتنفيذ المخططات الخفية.
كم نحن صرحاء وواضحين، أتعجب كيف يتهمنا الرجال بالتعقيد و الغموض، يالفتراءهم..

الشجعان

أمان الله على الشجعان، مقتحمى القلوب، غزاة النفوس والمهيمنين على التفكير كالتيجان فوق الرؤوس في العلا موضعهم.

أسوأ الصفات

محدش فينا كامل وكلنا مليانين عيوب ولولا ستر ربنا محدش كان إستحملنا، بس إحنا لو بنحاول نتكلم عن عيوبنا فده بيكون بهدف محاوله إصلاحها.. أغلب الناس أجمعت أن أسوأ صفات ممكن تكون فى الراجل هى البخل و العنف وعدم تحمل المسؤولية والتسرع والإهمال فى حين إن أسوأ صفات فى المرأة هى العناد والنكد وعدم النظافة وقلة الحياء و إنها تكون زى ما بيقولوا مسترجلة.. بخصوص الرجالة أظن فى صفات تانيه كتير مش مقبوله، يعنى أنا مثلاً أكتر نوع من الرجاله بنفر منهم هما السطحيين اللى كلامهم كتير ورغايين على الفاضى والمليان فى حين إنى بحترم جداً الراجل اللى كلامه بحساب وزى ما بيقولوا عقله يوزن بلد، مش معنى كده إنه لازم يكون لئيم أو حويط لا خالص أنا مبدأى فى الحياة إن التلقائية هى مفتاح القلوب والتصنع والتمثيل والتكلف هى مجرد أقنعة هتقع وتبان حقيقة الشخص عاجلاً وليس أجلاً .. أما بقى بخصوص الستات فبصراحة أكتر نوع بيستفزنى من البنات والستات هو النوع اللى فاهم إن النحنحه والدلع والمرقعه هى دى الانوثة، على فكرة إنتوا فاهمين غلط خالص، مش بقول تكونى ناشفه.. بس على فكرة لكل مقام مقال ومش مع أى حد أنوثتك لازم تظهر.. اللى بتوزع مشاعرها على كل اللى بتقابلهم بتخلص رصيدها، أصل كل واحد فينا مولود برصيد مشاعر ممكن يتجدد فى ظروف معينة وخاصة جداً غير كده مش بيتجدد .. مش شطاره على فكره إنك تصاحبى و تفركشى وتعكى ميت ألف مره، بعيداً عن الشق الدينى وإنه حرام ، لازم تفهمى إن أنوثتك دى حاجة كده غالية قوى ومش المفروض تطلع غير فى الوقت المناسب ومع الشخص المناسب ..

معشر اللبان

يا معشر الرجال لازم تعرفوا إن فى بنات كده، أستغفر الله العظيم يارب زى اللبانة تو ما تلزق فى راسك مش هتطلع ولا بالطبل البلدى ..

يا معشر اللبان، وربنا مش هيبصلك طول ما إنتى لازقاله وخنقاه كده، أقصى حاجة هيعملها علشان يحسسك بوجودك إنه هيهرش محاولاً إزالتك وإلقاءك فى مكانك الطبيعى( معروف هو إيه طبعاً ) ....

‫#‏بس_كده‬
‫#‏شغل_بنات‬
‫#‏كيدكن_عظيم‬

‫#‏فاهماكوا_يا_بتوع_اللبان‬يا معشر اللبان، وربنا مش هيبصلك طول ما إنتى لازقاله وخنقاه كده، أقصى حاجة هيعملها علشان يحسسك بوجودك إنه هيهرش محاولاً إزالتك وإلقاءك فى مكانك الطبيعى( معروف هو إيه طبعاً ) ....gri

مكر الرجال

قالت: من تكون تلك الفتاة التى تتود إليك، وتحاول التقرب منك؟
قال: أى فتاة؟
قالت: تلك الشقراء التى ترتدى تنورة حمراء وتضع عطر فرنسى شهير .. ألم تراها!! كيف تنكر حقيقة أنها إبتسمت إليك من على بعد سبعة عشر متراً منذ دقيقة مضت.. حقاً ألم تراها!!! يالمكر الرجال..

الصبر

على الرغم من أن أجسادهم مُنهكه جراء مشقة الرحلة، وعقولهم مُرهقة من كثرة التفكير، إلا أن أرواحهم مُنتعشة بالأمل وقلوبهم مُضيئة بنورالإيمان وعيونهم لا تغفل عن أحلام مشروعة لا تتحقق إلا بالصبر..

الخطاب التقليدى

رغم احترافيتها فى ترجمة مشاعرها إلى كلمات، إلا أنها كلما حاولت أن تكتب له ذلك الخطاب التقليدى ينتهى الأمر بيدين مرتعشتين وقلب يخفق بجنون و حمرة فى الوجنتين و إبتسامة طفولية بريئة...

الغيرة

حينما سألوه "هل تغار عليها؟"
أجاب : غالبا.
وحينما كرروا نفس السؤال عليها
أجابت ضاحكة : غيرة ! لا لا مستحيل، أنا فقط احمل ذلك السكين فى حقيبتي لأغراض أخرى لا تتعلق أبدا بقتل اى فتاة تحاول التقرب منه....

إختراعات وإبتكارات نحتاجها بشدة "1"

عقله الباطن: عارف إيه أكتر حاجة بتعصبنى منك وببقى نفسى أفجرك وأفجر نفسى علشان نخلص ونرتاح؟

هو : إيه يا موكوس، إشجينى...

عقله الباطن: إنفصام الشخصية اللى عندك ده يا بنى .. إيه مالوش أهل يسألوا عليه.. فى مواقف كتير بتبقى فاهم كل حاجة وعامل عبيط علشان تشوف آخر اللى قدامك ، فى حين إن فى مواقف تانيه سبحان الله نسبة الغباء عندك يا أخى بتوصل لأرقام قياسية لم يسبقك كائن بشرى برجلين ومناخير و20 صابع فى الوصول ليها من قبل..

هو: صمت ... صمت .. صمت ... بولولؤ . وكمان واحدة بولولؤ ...هيــــــــــــح.... طيب خُد الحبايه دى ونام شويه ...

*حبوب محو الذاكرة ممتدة المفعول، آثرها ليس دائم وأعراضها الجانبية لا تُذكر*

ليسوا كالبقية

خدعوك فقالوا بعد المسافات يقتل الود و قلة التواصل تطفئ بهجة الروح و ندرة الأحاديث تميت الرغبة في الإستمرار .. لابد انهم لم يتلذذوا بشغف إنتظار السعادة اللامتناهية ، ولم يتمتعوا باختلاس شهيق من نسيمات الصبر، ولم يعرفوا سر البسمات الخجوله أثناء مراقبة أحدهم في صمت... دعهم يتحدثون وصم اذانك فكلاكما يعلم ما يسكن قلبيكما ويوحد روحكما....

بالحب والحنية

همهمات وأحاديث جانبية بين أعضاء لجنة التقييم ....

الأستاذ على : يهمس فى أذن راجل يجلس بجانبه اللى هيدخل ده متوصى عليه من فوق ولازم يتعين فى الوظيفة اللى أعلنا عنها  متقرفوش فى الأسئلة زى عادتك يا أستاذ إسماعين، أكاد أجزملك إنهم مفصلين الإعلان عليه أصلاً، بيقولوا يقرب للراس الكبيره فبلاش تحرج نفسك  ويتحط مستقبلك الوظيفى على المحك..

الأستاذ إسماعيل: على الله بس يكون عنده الحد الأدنى من المهارات اللى تؤهله لشغل الوظيفه يا أستاذ على مأنا كمان مقدرش أخالف ضميرى.

الأستاذ على: يا إسماعين نيم ضميرك شويه يا أخى مش هتخسر حاجه ..

يُفتح باب الغرفة ويدخل شاب عشرينى توحى هيئته للوهلة الاولى بإنه لسه خارج طازة من غرزة أم حماصه ودماغه فى أعلى مستويات اللاوعى المنساق فى إطار  إدينى فى الهايف وأنا أحبك يا ننس...

الأستاذ على: أهلاً يا شريف يا إبنى ياريت تعرفنا بنفسك ..

شريف: أنا أسمى شريف وعندى 25 سنة وجاى من طرف مدير البنك بس كده..

الأستاذ إسماعيل: مقاطعاً ، آه يا حبيبى وماله مش عيب ما كله ماشى كده اليومين دول، طيب كلمنى أكتر عن مهاراتك، خططك للخمس سنين الجايين، حلمك، هدفك فى الحياة كده يعنى....

شريف: طيب واحده واحده كده بالصلاة ع النبى.. بخصوص المهارات أنا ممتاز فى ال  X box  تقدر تقول حريف، أما بقى  خطط الخمس سنين أتجوز واحدة حلوة وشقراء وعينيها زرقاء وبخصوص حلمى وهدفى فى الحياة بص أنا مش عارف بصراحة أنا عايز إيه بس تقدر تقول نفسى وامنية حياتى أسلم على الأستاذه فيفى عبده جداً بوصفها الأم المثالية لعام 2015 ....

الأستاذ إسماعيل: يحرسك لشبابك يا حلو يا نايتى يا كوتو موتو إنت ...

الأستاذ على : غمز وقرص ووكزولكز  إيه يا أستاذ إسماعين إحنا مش متفقين إن شريف ماشاء الله السيرة الذاتية بتاعته تغنى عن أى أسأله وإننا تقريباً متفقين إنه مناسب للوظيفة ..

الأستاذ إسماعيل: أنا معترض على الكلام ده، الولد اللى قبله اللى كان إسمه سالم ده ممتاز ومعاه شهادات ومؤهلات تخليه هو الأنسب للوظيفة وكمان مؤدب وجاد..

شريف : مقاطعاً إيه ياباشا مالك متزرزر ليه، الموضوع ده بيمشى بالحب كده والحنية.. سالم مين وبتاع مين ..

الأستاذ إسماعيل: إنت تسكت خالص يا بتاع فيفى عبده إنت.. إنت مكانك مش هنا يا بنى.. إنت أخرك تلعب بالبتاع اللى إنت قولت إسمه ده فى بيتكم ...

شريف : يتلفظ بلفظ خارج.

الأستاذ إسماعيل: يتهور ويقلع لا مؤاخذه حذائه ويهب صائحا .. أنا جبت اخرى من الفساد .. بقالى 20 سنة شغال فى منظومة فاسدة كلها تلوث وروتين وبيروقراطية ومفيش أمل تنضف.. وربنا  المعبود لو ده أخر يوم ليا فى الشغل لفش غلى فيك ياض إنت .. يجرى شريف محاولاً الهرب فى حين إن الإستاذ إسماعيل بيحلق عليه زيو زيريبو و ينجح إنه يزنقه فى ركن و إديلو إدى و فين يوجعك وتفشل محاولات الإستاذ على فى السيطرة على الأستاذ إسماعيل ...

بذور الأمل

-عارف الكراسى اللى إنت قاعد عليها دى بتاعة مين؟

*بتاعة اللى تعبوا وعايزين يريحوا فى النص، مش كده برضة ؟

- لا، غلط دى بتاعه اللى إستسلموا وعاجزين إنهم يكملوا.

* متبقاش قاسى، أنا مش بطل خارق أنا كل اللى عايزه إنى أبكى شويه وأرتاح وبعدين أكمل لأخر الطريق.

-عارف مين اللى بيكمل وينجح فى إنه يوصل للأخر فعلاً!! اللى حتى وهو بيبكى مش بيقف، بيستمر ولو بخطوات أبطأ.. مش طول الوقت بيتحرك بخطوات ثابتة ..أوقات كتير بيتهز، بس فى النهاية حتى لو كان مهزوز وبيبكى ومرهق فتأكد إن إخلاصه فى السعى مش هيروح هدر.. عارف دموعه دى كانت بتروى بذور الأمل اللى محدش كان شايفها غيره هو بس.. وعلشان كده أى حد هيمشى نفس الطريق من بعده هيلاقى إسمه محفور على كل زهرة أمل بتضحك فى منتهى التحدى قدام اليأس..

ذكريات الشتاء

 من ذكريات الشتا اللطيفة اللى عمرى ما هنساها لما كنا فى المدرسة الإبتدائى وكان فى نوع معين من الأطفال أمهاتهم  بتتفنن  فى إزاى تحشرهم جوه كل الهدوم اللى  فى الدولاب.... بتدفس إبنها أو بنتها تحت أطنان من الهدوم ، وكل ده تحت ال  Uniform     بتاع المدرسة مش فوقيه وتلاقى العيل من دول ماشى زى البطريق  اللى واكل حلة محشى كرنب وراسين قرنبيط من غير ما يهضم و بيتكعبل فى نفسه كده و دراعاته مش بتقفل على بعضها من كتر الحشر والدفس ورجليه كل واحده فى إتجاه من كتل البنطلونات اللى فوق بعضها  ده غير ال Capuchin   والكوفيه  والجوانتى المتبطن فرو من جوه ومتنساش على الأقل تلات شرابات، اتنين منهم صوف .. تلاقى العيل رفيع فى الأساس بس يبان هرقل فى مشيته من الحاجات والمحتاجات اللى ماشى بيها وطبعاً وشه هو الحاجه الوحيده اللى باينه من جسمه وبعدين ياقات الهدوم مبقلظه كده وياريتهم بلوفرات ألوان متناسقه لا باليته ألوان متحركة .. وبعدين ييجى على الفسحة من الفرهدة واللعب والشقاوة يصهد كده وخدوده تحمر ولما  تقوله أقلع الجاكت  أو خفف  يبصلك فى منتهى الرعب ويرد، ماما محرجه عليا مقلعش الجاكت لحسن أستهوى ويجيلى إلتهاب رئوى ونزلة شعبية حادة كبيسة وأموت.. ياراجل؟ قول وربنا كده؟؟؟  يعنى أنت مش هتموت من الكتمه دى ده انت هتطفس يا أخى  من اللى امك عاملاه فيك... أنا حاسه إن العيال دى فى بيوتها أمها بتكلفتها بميت لحاف وعشروميت بطانية  وبيجيلهم فطريات من كتر كمكمة الشرابات والجوانتيات .. ده غير أنه أمهم بتهريهم مشروبات ومبيسيبوش السرير غير لقضاء الحاجة فى الحمام.. ده على ما يقلع فيها نص ساعة .. تكون الحاجة إتقضت لوحدها .. يا ست إرحمى الواد وربنا هيعيا من الخنقة.. عارف بقى العيال دى لما بتكبر هما هما نفس النوعية اللى لما يسافر أمه تأمنه يحط جرايد على صدره  ويشرب شيح  وتيليو وحلبة حصى اللى بتعمل ريحة إيخيه pee pee  دى  وكل ده علشان ميعياش ويبقى صدره ملبش بلغم ... أيتها الأمهات اللى من النوعية دى رجاءاً إرحموا عيالكم، إعتقوهم لوجه الله إحنا عايشين فى أفريقيا وهى قارة تصنف مناخياً على إنها من أشمس وأحر القارات على وجه الكره الأرضية، أومال العيال اللى فى روسيا وكندا والقطب الشمالى دول أهاليهم يعملوا معاهم إيه بس ...إرحمونا يرحمكم ربنا....

نعم إشتاقت له

برودة الجو لم تمنعها من السير فى الظلام، لقد كان الدرب كاحل السواد، ربما كان مجرد إنعكاس لظلمة مشاعر الإشتياق التى بدأت تنمو داخل فؤادها نحوه... أومأت رأسها فى ضعف مُعترفةً بإشتياقها إليه ... هبت ريح بارده أجبرتها على رفع رأسها صوب السماء لتجد نجم لامع يداعب عينيها الغارقتين فى تمنى لقياه.. إبتسمت فى دفء وحنان وغمزت بعينها للنجم وهمست " إحمل سلامى له وبلغه أنه رغم إنشغالى فى دوامة الحياة لازلت أذكره، لا زلت أفكر فيه ولكن إياك أن تخبره إننى أشتاق إليه، فإن كان حقاً يشتاق إلى سوف يعلم دون أن تُبلغه" وبمجرد أن إنتهت من الهمس حجبت سحابة رمادية النجم اللامع، من يدرى لعلها أرسلته ليوصل الرسالة ويسلم الامانة ويبلغ الإبتسامة.

الُعمرين

وسلاماً على العُمرين، فإبن الخطاب رُمانة ميزان قلوب المتحابين فى الله، و إبن العاص مُقتحم ظلام النفوس بنور فتح الهدى