الوديعة

لعلك سمعتهم يقولون أن رسائل الوداع خُلقت لتسبق الفراق، لا تصدقهم فلقد فسرتها دوماً كإيداع جزء من أرواحنا لدى الحفيظ الذى لا تضيع عنده الودائع.

جنون

وإن سألوك عن العشق، فقُل جنون أصاب روح نقية فقررت أن تهوى من أعلى قمم الكون وقبل أن تلامس السفح ضمتها روح هائمه وأبت أن تتركها تنكسر .

طيب الروح

الله رحيم بعباده الصابرين، فإن أرهقت الحياة أجسادهم، طيّب أرواحهم بنفحات من رياض رحمته و غلف قلوبهم بسكينة الإيمان، فها هى دعوة من غريب بالستر وبسمة من طفل كالبدر و سند فى الحق دون هدر و ود لن ينقص ولو إنتظرنا دهر.

طوبى

طوبى لمن غضب فإلتزم الصمت، وضاقت به الدنيا فأستغفر، وإكتئب فأنعزل، وفقد الشغف فصبر دون إنسحاب، و تألم فلم يعاتب، ولما وجب الفراق، رحل فى هدوء دون جرح للمشاعر.

الصبر

هتمر عليك فترة فى حياتك حاجات كتير أتمنيتها وسعيت ليها بمنتهى الإخلاص هتتأخر وممكن كمان تحس فى لحظة إن تحقيقها بقى شبه مستحيل.. هتلاقى إن فى حاجات كنت مخطط لها محصلتش فى حين إن حاجات تانيه خالص خارج الخطة ظهرت فجأة وكمان هتلاقى إن فى حد عمال يزن فى ودانك إن الوقت بيجرى وإنت مستنى مين و لا إيه ؟؟ وليه صابر على الوضع ده .. العمر بيجرى واليوم اللى بيروح مش بيتعوض؟ وكل يوم هيفكروك بالعد التنازلى علشان تستسلم وتغير رأيك وضغطهم عليك هيزيد لدرجة إنك مش هتبقى طايق نفسك .. فى الوقت ده اوعى ترضى بالواقع ، أوعى تنفذ كلام ضد رغبتك وإرادتك طالما واثق إن إنتظارك وصبرك مش تضييع وقت وإن الحاجة اللى إنت مستنيها تستاهل إنك تحارب علشانها ...أرجوك عافر لأخر نفس وإياك تستسلم لحد ما تحقق حلمك إن شاء الله..

بحر التفاصيل

الغرق فى تفاصيل بعضهم كفيل بنزع الهموم من قلوبنا وإنعاش أرواحنا المُنهكة

آداب السؤال

على فكرة فى آداب للسؤال.. ياريت لما حد يسأل على حاجة يكون حاول فعلاً يدور على إجابة ويتعب شوية مش يسأل لمجرد الإستسهال. السؤال اللى إنت بتسأله أكيد فى غيرك كتير سألوه قبل كده وناس جاوبتهم... أنا معنديش مشكلة خالص إن حد يسأل على حاجة بل أى إنسان المفروض يكون فى منتهى السعادة لما بيتسأل لإن ربنا جايبله الخير والثواب لحد عنده بس اللى فعلاً بيزعج جداً لما حد يسأل عن حاجة وتجاوبه فيتمادى فى السؤال عن تفاصيل ممله جداً ممكن بمنتهى البساطة يعرفها من أى مُحرك بحث بس هو مكسل .. واللى بيزعل قوى بقى إن أغلب اللى بيعملوا كده فى العادة بيطلق عليهم باحثين أو طلبة بحث. 

يوماً ما

يوماً ما.. روحك وهى سارحه فى ملكوت الله هتخبط إذ فجأة فى روح حلوة smile emoticon إمسك فيها ومتسيبهاش مهما مر عليكم وقت صعب والظروف إتلخبطت، أصل الحال دوامه مًحال، إنما الروح الحلوة عمرها ما بتتغير لو لقيت اللى يرعاها ويحاوطها بحنان ..أوعى تفرط في الروح دى لإنها يوم لما بتضيع منك مستحيل تعرف تنسجم معاها تانى وكمان مستحيل تقابل زيها لآخر عمرك...

ربنا يهدى

بستغرب جداً من الناس اللى فاهمه إن "التدكين" ومنع الخير شطارة وفهلوه وذكاوه.. زى بالظبط الشخص اللى لما يلاقى فرصة شغل أو دراسة او منحة او تدريب أو سفر و يدارى علشان محدش ينافسه ويفوز هو بالحاجه دى.. لأ بجد إنتوا إزاى مقتنعين بكده؟؟ ده أوقات بيوصل بيهم الأمر لتضليلك أو أذيتك وإحباطك علشان متكملش اللى بتسعى فيه ...والله العظيم كل حاجه فى الدنيا رزق ومهما الواحد عمل مش هياخد أكتر من نصيبه واللى ربنا قاسمه.. تأكد إن كل خير بتمنعه عن حد هيتردلك وربنا مش هيسيبك وهيمنع عنك خير عاجلاً أو آجلاً وكل خير بتسعى فيه ربنا هيسخر من عبادة اللى يردهولك وقت ضيق وزنقة أصلها دايرة والكل بيلف جواها . 

عد تنازلى

قليلاً من العُزلة التمهيدية لن يضر، فقريباً جداً سوف أنفصل عن العالم كلياً..

الغيرة

غيرة الرجل أغلبها شك، وغيرة المرأة كلها حب.

الكمال لله وحده

لا يوجد نظام حكم كامل بدون نواقص و وهفوات فالمدينة الفاضلة لم يعد لها وجود، ولا يوجد ملك/رئيس/إمبراطور/أمير/سلطان لا يخطأ فالله وحده المعصوم من الخطأ، لا يوجد شعب كل مواطنيه ملائكة وملتزمين فالتمرد والإختلاف طبيعة البشر منذ بدء الخليقة، لا يوجد قاضى عادل لا يظلم ولو حتى نفسه فقلوب بنى آدم تميل مع الهوى، والأهم من ذلك لا يوجد إنسان يقدر أن يتحكم فى مصيرك فأنت وحدك سيد قرارك .. انت المُتحكم فى قناعاتك ومبادئك وإيمانك وأفكارك.. أنت فقط ولا أحد سواك.

سلام

مهما بلغت قوتى و إشتدت أجنحتى، ومهما حلقت عالياً هنا وهناك.. سأحتمى فى ظلك إلى الأبد .. تارة لتسند ضعفى، وتارة أخرى لتحتوينى.. فحُبك سَلام به إطمئن قلبى..

الطفولة الأبدية

حتى وإن شابت أجسادنا، لا تخافى يا حبيبتى ستبقى أرواحنا بريئة ونقية للأبد... قسماً بحبك سأجعل من روحى قلعة تحتضن روحك حتى لا تنطفأ شمعة الطفولة بداخلك مهما زادت عواصف الدهر..

صباح الأمل

صباح الخير على المثابرين والصابرين، صباح الخير على اللى لسه متفائلين وعندهم ثقة ويقين، صباح الخير على جنود الحق اللى بيحاربوا ضعف نفوسهم، صباح الخير على النفوس الراضية بالمكتوب، صباح الخير على اللى بيسعوا من غير زهق ولا ملل، والأهم بقى .. صباح الخير على الناس اللى روحهم حلوة ومجرد التفكير فيهم بيبسطنا ويقوينا علشان نكمل للأخر .