فى مقولة باللغة
الإنجليزية بتقول " كن صديقاً لمن ليسوا فى مثل عمرك ، إقضى وقتك مع أشخاص
لايتحدثون لغتك الأم ،تعرف على أشخاص من
مستويات إجتماعية مختلفة عن المستوى الذى نشأت فيه .هكذا ترى العالم على حقيقته ،
هكذا تنضج وترتقى " . قررت أبدأ بالأولى وأصاحب حد أكبر منى،ودى كانت بداية معرفتى
بعم صابر ( حوار فرق السن وسع منى شويه :D أصلة أكبر منى بحوالى 50 سنة ) . كنت بصور كتاب إقتصادى
فى مكتبة ولفت نظرى إنه مشغل فريد الأطرش وكل المكتبة بوسترات وصور فريد ، حبيت
أبدأ معاه حوار ودى علشان الوقت يمر أسرع وهو بيصور الكتاب .
أنا :من الواضح أن
حضرتك بتحب فريد الأطرش جداً !
عم صابر : يااااه
يا أستاذة ، هو فى حد بيعرف يغنى زى فريد ، ده أمير إبن أمراء ( أظن أنه يقصد
المعنى الحرفى للكلمة لإن فريد فعلياً كان من عائلة الأطرش العريقة فى جبل الدروز) .
أنا : ربنا يرحمه
ويروق بالك ، بس الدنيا إتغيرت مش كده ؟
عم صابر : كل زمن
وله أوانه يا أستاذه ، بس إنتى شكلك بتفهمى ؟
أنا : (ضحكة وصدمة)
الله يخليك بس ليه ؟
عم صابر : أصلك
كنتى بتدندى مع فريد أول مادخلتى ، شكلك بتسمعيه .
أنا : آه أوقات ،
أنا بسمع أغانى قديمة بشكل عام .
عم صابر : نظرتى
متخيبش أبداً .
أنا : طيب بما إنك
شايف إنى بفهم وييجى منى ، ما تعلمنى حاجه لوجه الله ؟
عم صابر : تحت
أمرك طبعاً .
أنا: نفسى أتعلم
عن الدنيا أكتر .
عم صابر ( ضحكة
مجلجلة) ياااااه إنتى لسه صغيرة قوى يابنتى ، انتى محتاجه سنين وسنين علشان تفهمى الدنيا
.
أنا : طيب ساعدنى
وشاركنى بسنين عمرك اللى فاتت .
عم صابر : إزاى
يعنى ؟؟
أنا : هقولك كلمة
ورا كلمة وعايزاك ترد بأول حاجه هتخطر على بالك .
عم صابر : موافق ،
إبدأى .
الدنيا ( محطات) ،
الرزق ( متقسم ) ، حياتك ( مراحل ) ، الغايب ( هيعود) ، الحب ( أمى الله
يرحمها) ، الرضا ( نعمة ) ، الصحة ( كنز)
، الزمن ( بينسى) ، الحنية ( أم العيال ) ، العلم ( مالوش كبير ) ، الأمل ( نور) ،
الحسد ( مرض والعياذ بالله ) ، بكره ( ضى الشمس ) ، الروقان ( أغنية الربيع لفريد)
، بلدنا ( حلوة بناسها) ، الشوق ( أم كلثوم) ، أنا ( مختلفة ) .
وقفت لما قالى إنى
مختلفة ، حسيت بسعادة كبيرة ،أصله قالها بضحكة صافية كلها أمل ، وهنا حسيت إنى
أقدر أكمل باقى أجزاء المقولة مع أشخاص تانيين من غير ماحد يتهمنى بالجنون ... قررت أدون كل حاجه هتعلمها علشان الزمن مينسينيش زى ماقال عم صابر ، قررت أكون
فعلاً مختلفة .
