عانس بمزاجى

خلاص كده جابت آخرها واللقب لزق رسمى....موتوا خطيبى المستقبلى واللى كان آخر أمل ليا....قتلوا ذفتوتى ...آه يانى ياذوفه... يابخت الموت اللى أخدك منى علشان هتسليه بعبطك... كل آمالى إنهارت خلاص و خططى إنى أتجوز القذافى وأعمل فرحى فى خيمه فى ليبيا  وكمان مهرى اللى كان هيبقى نص أبيار البترول  اللى هناك ( والله شكل حقد ونق البنات هو اللى جابنى ورا، قعدوا يبصولى فى الجوازه لحد ما العريس فلسع  بالسلامه وياريته طفش لأ ده مات) وطبعاً بم إن مفيش رجاله فى مصر يبقى خلاص  قفلت من كل ناحيه  ( أقصد طبعاً مفيش رجاله بتتجوز اليومين دول أوعوا حد يفهمنى غلط ، أنا بتكلم من منطلق إن الناس فلست بعد الثوره وكده يعنى) ، تصدقوا بقى هفتقد ذوفه جدا  وخاصةً هبله بجد كان راجل مُسلى كده ودماغه فيها كتاكيت (محدش يقنعنى إنه كان عنده مخ ، مستحيل أصدق)  ده أنا لما كنت ببقى زعلانه أو مخنوقه بجيب الفيديو بتاع التوك توك والشمسيه وأتفرج عليه...ياااااااه كنت بنسى زعلى على طول ، كمان كان فى توافق رهيب بيننا ( كان فى بينا كيميا وفيزيا  وكل مواد علمى علوم وعلمى رياضه كمان، هييييه دنيا أيام لا يرجعها ربنا أيام ثانويه عاميه  دى ) عارفين أنا بقول فى توافق ليه لإن لو تفتكروا فى خُطبه الجرذان ومن أنتم وزنجا زنجا دار دار كان بيتكلم بسرعه وبياكل الحروف وكان نص الخُطبه كُحه وغرغره  كولكلش رهيب من العته على الهبل مع القليل من الهطل المتمركز فى المخيخ ( دا إذا كان عنده مخيخ أصلاَ) ، أنا كمان لما بتوتر بتكلم بسرعه كده  شوفتوا التوافق بقى ، أه نسيت أقولكم إن مامتى هى اللى قالتلى إنه مات . كنت قاعده كده فى أمان الله لا بيا ولا عليا  لقيتها بتقولى خطيبك مات واترملتى يا نحس من قبل ما تتجوزى هتفضلى طول عمرك كده قاعده فى أرابيزى ،بصراحه أنا مصدقتش قمت جرى فتحت على الأخبار لقيت فعلاً إنهم قتلوه ( يافرحه ماتمت  خدها الحُمار وغار)  بس فى حاجه واحده مصبرانى على موته ومديانى أمل إنه لسه أكيد فى حُكام عرب كتير  عندهم نفس العند والتمسك بالسلطه وداء العظمه والضمير الأستيك والايد المنشار اللى طالعه تنهب نازله تنهب والذمه السوسته اللى تساع سرقة بلاد مش بلد واحده ، بس السؤال اللى محيرنى بقى هل بعد ثورات الربيع العربى هتفضل النوعيه دى من الحُكام !!! وهل عدوى الثورات ممكن متوصلش لبعض الدول العربيه أو حتى لو وصلت ميكونش ليها تأثير فعّال فى التحول الديمقراطى  لإن حكام الدول دى مسنودين من الغرب  علشان مصالح متبادله  أو حتى فى علاقة نديه  مع السياسه الامريكيه  (وأكبر مثال سوريا اللى على رأس الدول المارقه فى القائمه الأمريكيه لكنها مش قادره تهوب ناحيتها اليومين دول لانها مسنوده من إيران وأمريكا مش عايزه مشاكل تانيه مع إيران  كفايه عليها حوار النووى اللى مصدعها ) بس فى الأخر انا بقول لو عنوستى هى اللى هتحل مشكله الحُكام المستبدين فى الوطن العربى كله مش ليبيا بس أنا مستعده أبقى عانس بمزاجى ( على أساس إنى لقيت وقلت لأ)  ويلا إن شا الله محد حوش.

قابلت الموت

صوت الموت بينادى عليا ***** إنتى بتاعتى وملكى وليا

بَص وقالى تعالى معايا    *****    يلا بسرعه قوام ويايا

قلبى وقع حَصَل رجليا     ***** راح النور من ننى عينيا

شَبَكِت إيده ويا إيديا       *****        بَدل قلبى وغير فيا

لف ودار بالدنيا وبيا       ***** رجعت دوشه من حواليا

صوت الموت نادى بحنيه *****  دورك لسه المره الجايه.

خان الصديق

ياطير وطاير فى البراح...أبيض ولا نور الصباح...ممكن تسلفنى الجناح !!! هاخدلى لفه فى السما أمحى همومى والجراح وأنسى صديق سابنى وراح...هفرد ريشاتك فى الهوا وأرقص مع نجوم الفضا ..هضحك وأعلى ضحكتى..هصرخ بعزم قوتى.. عايش وحيد لكن سعيد فى دنيتى.

ساحرة الأمانى

الكلمتين اللى جايين دول هيزعلوا ناس كتير منى بس معلش إستحملونى وسيبونى أبعبر عن رأيي ...يعنى هى جت عليا أنا ..ما الكل عمال يقول رأيه على الفضائيات حتى أم حماده لما أستضافوها على خالتى اللتاته تى فى، أبدت رأيها فى إرتفاع أسعار السلع الغذائيه مع إقتراب عيد الأضحى معلله هذا الإرتفاع  بنق وقر أم حنان العيد اللى فات لما قالت إن الخرفان كتير السنه دى والبلد مليانه خير ( قرها دكر أم حنان دى)....المهم بقى من غير رغى أنا بصراحه عندى حاله إكتئاب وإحباط عام من الأوضاع اللى إحنا عايشين فيها دى... أفتح عينى الصبح على جرايد ومجلات نصها بيهول والنص التانى بيهون مفيهاش جريده واحده بتنقل الحقيقه بوضوح وصراحه  أقول بلاش قرف على الصبح أفتح النت على اساس انى أشوف فيديو عبيط أو ألعب لعبه أون لاين هبله من اللى بيجيبوا تخلف عقلى علشان انسى مرارة العيشه   الآقى  حد عامل شير لخبر كله تأليف ويسم البدن على الصبح ( يقطع النت على النتيت) أروح قافله الكمبيوتر ونازله  الجامعه  ..وانا فى الطريق بقى خدوا عندكم ...الناس اللى فى الشارع كله بيفتى فى كل حاجه وفى اى حاجه..أركب الميكروباص يروح السواق مشغل محطه راديو مصر  اللى بتذيع اخبار إنهيار البورصه وإننا بنسحب من الإحتياطى وشويه وهنشحت(قال يعنى الثقافه مقطعه بعضيها ماله شعبولا وبعرور!!)...أحط السماعات فى ودانى واشغل أغنيه أطفال هبله  وأعيش دور العته الطفولى المتأخر ويادوب أرفع عينى وابص من الشباك الآقى إعلانات الأحزاب اللى داخله فى الإنتخابات واللى نص مؤسسيها من الفلول وطبعا كلها تحت مسميات متاجره بالثوره، أوصل الجامعه الآقى  التيارات السياسيه المختلفه حاطه ملصقات بيرحبوا بالطلبه الجدد وبيدوهم هدايا ومنشورات لإستقطابهم(زى مانكون  فى مجلس الشعب مش  حرم جامعى ليه قدسيه المسجد والكنيسه ) ،( ماخلاص مبقاش فى حرس جامعى ، أنا مش ضد إن الحرس كان مزودها وبيتدخل كتير بس انا ضد سحب صلاحياته كلها وضد إنه يمشى من الجامعه لإنى بقيت بشوف مناظر يستحيل كانت تحصل فى وجودهم) أسيب كل ده وأدخل المحاضره الآقى نفس الدكاتره اللى نصهم ركب الموجه بعد الثوره على الرغم من إن اغلبهم متعين وزايط بالوسايط ( بس مش الكل اكيد فى دكاتره محترمين ) بييجى أخر اليوم وبحط راسى على المخده ببقى حاسه إن دماغى هتنفجر وإن مخى بيسيح....آيوه عارفه إن الإستقرار على الساحه السياسيه والأمنيه مش قبل سنتين وعلى الساحه الإقتصاديه مش قبل 5 سنين على الأقل إن ماكنوش 10 سنين، بس عارفين أنا ليا حلم بسيط ونفسى أحققه بس فى الظروف دى محدش يقدر يحققه غير مارد أو عفريت او يمكن ساحرة الأمانى.(ياساحرة الأمانى عندى احلام كتيرلكن فى حلم واحد أرجوكى تحققيه....نفسى أكون إنسان قلبه مليان حنان ... يتنفس الحريه... رافع راسه بأمان ... عايش عيشه هنيه  مش حانى  ضهره جبان.... ياساحرة الأمانى حلمى  بيبان كبير لكنه حلم غالى من فضلك حققيه.)

مواطن مصرى

أنا مصرى عايش حكايات  *****     شايل هم وكلى آهات

قلبى وجعنى م الشعارات  *****  صوتى سكت بطل هتافات

راديو بيذيع الحوارات     *****      تلفزيون مليان لقاءات

أَقَرا جرايد ومجلات      *****         فيها نفس المنشتات

سُلطه وسرقت مليارات   *****     شهدا وماتوا بالألوفات

العيد قرب هات وهات    ***** إشى لحمه وخضار طلبات

عندى عيال عايزين ميات *****      كل كلامهم إعلانات

عايزين بونبون شوكلاتات*****      بس منين القرشينات

شكلى هفلسع م الأزمات   ***** وأبقى مواطن ودع مات.

محبت ♥ 사랑 ♥ प्यार ♥ Amor ♥ Aşk♥ Love ♥ الحب

♥   بصراحه بقى دى أول مره أتكلم فى الحب والرومانسيه والحوارات دى...لإن الدنيا بالنسبالى ملاهى كبيره وانا مقضياها ضحك ولعب... صحيح جسمى بيكبر لكن عقلى لسه جواه الطفله الصغيره اللى بتحب الحاجات الحلوه والعرايس والدباديب...على فكره دى مش تفاهه لإن كل واحد فينا جواه جانب طفولى ( بس انا عندى زياده حبتين تلاته أربعه ) بالنسبه بقى لموضوع الحب ... أنا مش هفتى ولا هعمل نفسى أسامه منير أنا  هقول رأيي بمنتهى الصراحه وأكيد بحترم أى حد يعارض الرأى ده...بصوا بقى أنا شايفه أن الحب موجود فى كل حاجه فى حياتنا ومش هصدعكم بقى وأقول انواعه لإنكم كلكم عارفينها وحافظينها ( إنت ماما وإنت بابا وإنت أنور وجدى وحوارات الافلام العربى القديمه دى)  صحيح أنا ماليش تجارب  ولا حبيت قبل كده ( ولا عايزه بصراحه ..يقطع الحب وسنينه مش سايب حد فى حاله)  بس قدرت أكون رأى بسيط من تجارب المحيطين وإن مفهوم الحب بيختلف تماماً بالنسبه للأولاد عن البنات... مش هقول كل البنات رومانسيين وكل الاولاد مش بيعرفوا يعبروا عن مشاعرهم..لأ لإن فى بنات كتير جداً بتحب بعقلها مش بقلبها  وأولاد كتير جداً بيعرفوا يعبروا عن مشاعرهم ورومانسيين جداً ( مش لازم  يكون نحنوح ومسبسب علشان يبقى رومانسى لأ ممكن يكون رومانسى بطريقه فيها رجوله )   وكمان أنا فعلاً إتأكدت من إن الولد  قلبه يساع أكتر من بنت فى نفس الوقت ويكون  بيحبهم كلهم من قلبه ( اللهم لا إعتراض...ربنا خلقهم كده..هنعمل إيه يعنى يابنات.. ياغلابه يانى يا مكسورين الجناح )  أما البنت فمستحيل  تحب أكتر من حد هو يادوب ولد واحد بيملى  قلبها وحياتها واللى يقول لأ فى بنات بتحب أكتر من ولد فى نفس الوقت ..هرد وأقوله لأ دى بتمثل وبتحور مش بتحب بجد ... وطبعاً زى ما كتير منكم حَب  برضه كتير منكم فارق وساب حبيبه أو حبيبته... أيا كانت الظروف  ومين ساب التانى فمسأله النسيان دى كدبه كبيره لإن محدش أبداً بينسى حب قديم ..ممكن تلهيه الدنيا بس عمره مابينسى أبداً وخصوصاً اول حب... يوووووووه صدعتكم انا عارفه بس الموضوع  طويل وممكن أعمله أجزاء علشان متزهقوش منى...بس فى حاجه لازم أقولها للبنات وبالذات طالبات الجامعه...الاّ وهى إن الشباب بيزهقوا بسرعه فمتبقيش نكديه يا حلوه وتكرهيه فى اليوم اللى عرفك فيه وبطلى زن كتير ومتخنقيهوش  وكمان فى نفس الوقت أنا مش ضد إنكم تحبوا بعض بس انا ضد إنكم تعملوا حاجه غلط أو تخبوا على اهلكم ..إيه المشكله إنكم تعرفوا أهلكم أنكم بتحبوا بعض طالما مبتعملوش حاجه غلط ويكون بعد التخرج فى إرتباط رسمى وهيجمعكم بيت واحد فى يوم من الأيام.. كمان أنا ضد إنكم تقضوها خروجات وتنفضوا للمحاضرات وكمان مسأله مسك الايدين والحوارات الفاشله دى بعيداً عن كونه حرام ... دايما بيقولوا الولد مبيتجوزش بنت صاحبها وده فعلا صح بس بيتجوز اللى بيحبها واللى يستأمنها على بيته وعياله  فى غيابه ..وكمان بيقولوا  الجوهره  الغاليه بتكون غاليه فى عيون الناس علشان محدش بيقدر يلمسها لكن الزجاج رخيص لإن الكل بيلمسه  وعلشان كده بيتكسر بسهوله  وفى الأخر أحب أقول ( حبيب ٌ تمادى فى العناد  وزاد هجراً بترك البلاد وترك ناراً تاكل فى الفؤاد  فوصل خبرى لأخر ركن فى البلاد وذاع صيتى بين العباد بمحبوبٍ قتله الهوى وصار قلبهُ رماد) ♥

The Queen

لقد عانيتُ منذ الطفوله...حُرمتُ من البهجه..عِشتُ أياماً

 قاسيه تنحنى لها الجِبال...ولكنى صمدت ورفعت رأسى  فى شموخ...ناضلت إلى أن غيرت الواقع المؤلم إلى عالم جديد أنا ملكتهُ.......I  have suffered since I was child and  was deprived from joy.I have been through tough days that can destroy mountains,but  I stood and raised my head with dignity.I struggled until I succeeded in transforming this painful reality into anew world I’m it’s queen.