زيزو صانع السعادة

مين هما صناع السعادة ؟ هل إنت واحد منهم ؟ هل قابلت صانع سعادة قبل كده ؟ إيه رأيكم نحاول مع بعض نتعرف على الناس دى من خلال مواقف حصلت معايا ، وكل واحد فيكم يفكر فى الموقف ولو مر عليه موقف مشابه ياريت يشاركنا بيه .

الموقف الأول :

المكان << محطة مترو عين شمس .

الزمان <<  إمبارح حوالى الساعة تلاته العصر .

المترو كان زحمة جداً فى عربية السيدات والناس نصها مهموم وساكت والنص تانى عمال يتكلم عن مشاكله وهمومه . عدت محطة المطرية وجت محطة عين شمس. الباب إتفتح وطلع راجل قصير وشعرة أبيض ( شكله يبين سن أكبر من سنه الحقيقى ، الزمن ساب علامته وبصمته فى كل خط من خطوط وشه) الراجل ده كان معاه شنطه وبدأ الحوار كالتالى :

الراجل : Ladies & Girls . May I have your attention please !!

( الراجل كان بيتكلم إنجليزى بلهجة أمريكية سليمة ميه فى الميه)

الركاب :  الكل إنتبه وكان رد فعلهم سريع جداً وإستجابتهم فى منتهى القوة   .

الراجل : سيداتى وآنساتى ، أرجو الإنتباه .

الركاب  : الأنظار كلها على الراجل ده .

الراجل : My name is zizo   أنا إسمى زيزو .

الركاب :  بيحاولوا يداروا إبتسامتهم .

المترو إتحرك وصوت العجلات غطى على زيزو فسكت بس كان بيبصلى وبيبستملى رفعت إبهامى بعلامة أحسنت ( Thumbs up)  وقولت   MR . Zizo your English is perfect .I love it .  رد فعله كان أكتر من رائع . قالى وهو بيبتسم وفى عينه لمعان زى الأطفال  ! Oh  . thank you young ladyبدأت أقـــــــرب من البـــــاب لما المتــرو دخــــــل المحطــة اللى بعدها علشـــان أجهز نفســى للنزول سألنــىare you  leaving now  ?  قولتله مع الأسف yes  قالى

. My bad luck

Next time inshAllah .

I’m sure  we will see each other again .

 Take care till then.

ضحكت وقولتله إن شاء الله . نزلت من المترو ولسه صوته فى ودنى وهو بيقول

I have a wonderful surprise for you .

كان نفسى أعرف زيزو بيبيع إيه ؟ وكان نفسى أعرف السر وراء لهجته الممتازة . فضل زيزو معلق فى مخى لحد ما وصلت للمكان اللى المفروض أروحه . زيزو صانع سعادة حول مهنته لمصدر لجلب السعادة لنفسه ولكل اللى حوالية . زيزو إنسان روحه حلوة  وقلبه صافى .

فى ملحوظة مهم أقولهالكم . لما حكيت لوالدتى قالتلى رأى أنا حاسه إنه واقعى جداً وهو إن زيزو كان ترجمان شغال فى السياحة ولما الأوضاع بقت صعبة بقى يبيع فى المترو وبذكائه إستغل خبرته فى جذب الإنتباه والترويج لبضاعته . زيزو واحد من صناع سعادة كتير بنقابلهم فى حياتنا . زيزو أول واحد حبيت أبدأ بيه سلسة مدونات صناع السعادة . لو حد فيكم عنده موقف او تجربة ياريت يشاركنا بيها ويتحول هو كمان لصانع سعادة .

خيرة الأخيار

يادفعة ياللى بتحمـــى أرضنا وأرض الجـــــدود

يا بو العزيمة يا خلى يا اللى واقف على الحدود

زينة الشباب يا ولـــد خيرة أخيـــــار الجنــــود

تصرخ وصوت صرختك زى زئير الأســـــود

سمى وصلى يا جدع ده جنودنا شالوا الســــدود

ربى يوحــــــد صفهـــم ولا حد بينهم يفــــــوت

خلى الاعادى تنقهر وبــذل فوزنـــــــا تمــــوت 

أحلام اليقظة

أوقات كتير أحلام اليقظة بتاخدنى لبعيد جدا ً ، لدرجة إنى بنعزل عن الواقع بكل تفاصيله وأدوب فى العالم اللى بتمنى إنى أعيش فيه . فى ناس بتسمي الحالة دى خيال واسع وناس تانية بتقول عليها أحلام يقظة ( وأنا من الناس دى ) وناس تالتة  بتقول عليه  ( جنان مع عدم إهمال الإشارة باليد عند الأذن ) . طيب إيه رأيكم أشارككم بشويه حاجات من اللى  بتحصل فى عالمى الخاص !!! وليكم إنتم فى النهاية الحكم على مسمى الحالة اللى أنا فيها دى .

نفسى أعيش فى بيت خشب قريب من البحر . البيت ده كل حيطانه رفوف فيها كتب . نفسى يكون عندى ترابيزة صغيرة عليها عدة الكيف ( القهوة  التركى يا جدعان مخكم ميحودش شمال ) سبرتايتى النحاس ، الكنكة والفنجان المقلوب  والكاس الكريستال، الشمعة و الكبريت . وأكيد مطحنة البن اليدوى الخشب . نفسى يبقى فى ركن ريحته حلوة  وفيه فونغراف نحاس وإسطوانات كتير ودايماً طالع منه صوت فيروز الصبح وصوت أم كلثوم بليل . نفسى البيت ده يبقى دايماً أبوابه مفتوحه للكل وريحته خبيز من عمايل إيديا ( الخبيز بيحسسنى بالسعادة ووجود الدقيق فى البيت بيحسسنى بالخير  والكرم ، صدقونى ريحة أى حاجة تعبت فى خبزها بتحسسنى بالسلام الداخلى ) .

نفسى أعمل شاى بالنعناع ( ممكن قهوة مفيش مانع ) وأروح أشربة الساعة 12 بليل على كوبرى أستانلى وانا بسمع فيروز ( بالذات فوق هاتيك الربى وكمان طلعلى البكى ) أغمض عينى وأسيب ودانى تستمتع بمزج صوت فيروز مع أمواج البحر .

نفسى أسهر فى الصحراء على راكية نار وعازف ربابة يحكيلى المواويل الشعبية بمزاج . نفسى أقعد مع ناس عواجيز وأسمعهم بيحكوا عن ذكرايتهم زى ما تكون حصلت إمبارح  ( على الرغم من إنهم ممكن يكونوا ناسيين أسامى أولادهم) . نفسى يبقى عندى يوم كل إسبوع مخصص للأطفال وبس . مش عايزة أتكلم مع اى حد عمره أكبر من أربع سنين فى اليوم ده . عايزة ألعب مع الأطفال ، أتفاعل مع حكايتهم البريئة ، أضحك على ضحكهم وأفرح بحبهم .

عارفين أنا لو قعدت أقولكم على اللى نفسى فيه ممكن يمضى عمرى من غير ما أحقق أى حاجه من اللى نفسى فيها ، وأظن كمان إنكم بدأتوا تصدعوا من الرغى بتاعى  . بس متنسوش أنا مستنية رأيكم فى الحالة اللى أنا فيها دى . ياترى ممكن تسموها إيه!!

مليكتى

يــــا مُنيـــة النفـــسِ عانقينــــــــى

يـا توأم روحــــــــــــــى دللينــــى

من نهر حنانك أغمرينـــــــــــــى

وعن كل ذلة سامحينـــــــــــــــى

فى يوم عيدك إغفري لــــــــــى

وعلى تقصيــرى عاقبينــــــــى

ولكن إياكى أن تتــــــــركينـــى

 تعالى بين أضلاعى وإستكينى

فأنا منكى وإليكى تنتهى سنينى .

أخويا الشهيد

بداية نهاية كتبها الشـهــــيـــــــد

سطرها بدمه ما هو أصله عنيد

وإيش يعمل العمر لو كان مديد

فى ذل ومهانه وقبضة حديــــد

لا تبكى يا عينى ع أخويا الفقيد

ولاإنت يا قلبى ده ميت سعيـــد

مسافر لجنة مكانهـــــــا بعيــــد

بلادى تنادى فهل من مزيــــد !

بلبى نداها بـدم الـــــوريـــــــــد

ده حبى عبادة  وعشقى فريــــد

وعمره ما ينقص ولكن يزيـــــد

سذاجتى

أشتاق لها ، أحن لعنادها ، أتوق لضحكتها ، أتلهف لإبتسامتها . آلا يكفيكى هجراً !! آلا يضنيكى بعداً !! آلا تتألمين لفراقى !! آلا تشعرين بإشتياقى !! عودى . إملئى عالمى بضجيجك وصراخك ، إثقلى كاهلى برغباتك الطفولية ونزعاتك الجنونية . فقط عودى ، فقد مللت نصفى الناضج وإشتقت للنصف الساذج.

حوار عادى

المكان : بيانكى .

الزمان : 9.30-10.15 مساءاً .

صورة توضيحية : بابا قاعد على الكنبة وأنا مريحه راسى على كتفه اليمين والبيت كله نايم وإحنا مقضينها بنتفرج على فيلم ( عروس النيل ) أيون عليكم نور بتاع هاميس ( مع عدم إهمال عامل مهم جداً علشان الصورة توضح .. أنا من وقت للتانى بتغزل فى رشدى أباظة لمجرد إنى عايزة أغيظ بابا ) .

وكان الحوار كالتالى :

بابا : أنا نعسان هخلص كوباية النعناع وأقوم أنام .

أنا : بابا خليك شويه كمان معايا ، الفيلم لسه بتاع نص ساعه على ما يخلص ( بصراحه كنت مستحليه الركنه على كتفه ) .

بابا : طيب ماشى  ( كالعادة زى أى راجل كلامه قليل ) .

أنا : بابا على فكرة بعد الفيلم روتانا كلاسيك بتجيب حفلة كل يوم لأم كلثوم .

بابا: .......... ( صمت متابع الفيلم ومنفضلى ).

أنا : بينترلااسؤعرلشلاؤتلآبيةرلايسرتالاس ( أى رغى وهرتله المهم أصدع بابا وخلاص أصله وحشنى ) .

بابا : هى الساعة كام ؟

أنا : قبل عشره بشويه .

بابا : ........ ( صمت تانى ، ما خلاص بقى لازم تبقوا عرفتوا  إن النقط معناها صمت ) .

أنا :بابا عارف نفسى فى إيه بس متتريقش عليا !؟

بابا : قولى يا مانو ( إسم الدلع اللى بابا بيندهلى بيه .. عادى يعنى ميغركوش إنى بلطجية .. بس برضه بتدلع ).

أنا : نفسى فى بيت فيه  رفوف خشب كلها كتب أنا قرأتها ، ونفسى فى شمع ريحته حلوة ، وسبرتاية نحاس وقهوة محوجه عمايل إيديا من البن اللى طحنته يدوى فى مطحنتى البيتى ، وكمان نفسى فى فونوغراف وإسطوانات قديمة .. نفسى فى كل إسطوانات أم كلثوم و فيروز وشادية وعبد المطلب وعبده السروجى وصباح وسيد درويش والشيخ أمام وسيد مكاوى وغيرهم وغيرهم ..

بابا : قاطعنى بضحكة عالية ( إيه يابنتى ده الحاجات دى بقت أنتيكا وصعب تلاقيها ، دى بقت فى المتاحف وبس ) .

أنا : أهو حلم يا بابا .. لو مش هقدر أعيشه هبقى على الأقل أتخيل نفسى جواه .

بابا : الحفلة بتاعة أم كلثوم بدأت شايفة يا مانو الناس كانت راقية إزاى ومحترمين .

أنا : آه يابابا ناس رايقة ومدلعين نفسهم حفلات بقى وحركات .

بابا : ( بيدندن اللحن وبيحاول يفتكر دى أغنية إيه ) ومرة واحدة لقيته قال ( فكرونى ).

أنا : هما مين دول اللى فكروك يا بابا وفكروك بإيه ؟!

بابا : يابنتى الأغنية إسمها فكرونى .

أنا : يا بابا يا جامد .. وربنا إنت موسوعة حرة .

بابا : ( منفضلى تماماً ومنسجم مع كلمات الأغنية وبيدندن ) أول مره أعرف إن بابا رومانسى كده .

أنا : أنا نفسى فى شاى مطبوخ بنعناع فريش أعملك معايا يا بابا ؟

بابا : لأ أنا خلاص هقوم أنام تصبحى على خير .

أنا : وإنت من أهل الخير يابابا .

بابا دخل نام .. وأنا عملت كوباية الشاى المتين وقاعده حالياً بصدعكم بالرغى ده .. الحوار ده فعلاً دار بينى وبين والدى والغرض من نشره .. أهالينا مش دقه قديمه ولا حاجه .. أهالينا كانوا شباب فى يوم من الأيام ويمكن يكون زمنهم أحسن ميت مره من زماننا ده .. لو فكرنا نقرب منهم هنستغرب من حاجات عمرنا ما كنا نعرفها عنهم على الرغم من طول المده اللى عايشنها معاهم تحت سقف بيت واحد.. مش معنى إننا عايشين سوا إننا عارفين بعض كويس .. مش معنى إننا بنتكلم إننا فاهمين بعض كويس ...