إسحاق حنا smile emoticon
ألطف إنسان ممكن تقابله فى حياتك، بسمته وروحه الحلوة بقت نادرة فى الزمن ده .
ركبت التاكسى وقولت سلام عليكم كالعادة، رد السواق بضحكة صافية وعليكم السلام ورحمة الله وبركاته.
لمحت صليب على إيده وإفتكرت إن إحتفالات الكنيسة بعيد العدرا كانت إمبارح، فقولتله انا شايفه صليب على إيدك، كل سنة وحضرتك طيب smile emoticon يا الله على نظرته فى المراية وهو بيبصلى وعينية كلها فرحة وسعادة ..قالى وحضرتك ومصر كلها بخير يا أستاذة .. أنا متشكر جداً على ذوقك ... حسيت أنى ممكن أدردش معاه علشان الوقت يمر بسرعة لحد ما نوصل ومن هنا بدأ الحوار wink emoticon
أنا : بس الله يكون فى عونك، الشغلانة دى صعبة ، ده كفاية إنك بتتعامل مع أمثالى من الستات اللى مبتعرفش تسوق grin emoticon
إسحاق: ( ضحكة بكسوف) ، مش كل الستات والله، ده فى بنات زى الجن ، بيسوقوا ولا شوماخر .
أنا: الله يكرمك .. بس طبعاً حضرتك تقصد بنات غير المصريات اللى مبيعرفوش يمينهم من شمالهم .
إسحاق: الموضوع كله إنك تجمدى قلبك وتمارسى وإنتى هتبقى زى الفل، بس متنسيش تتعلمى تركنى إزاى..
أنا : إيه ده إنت عرفت منين إنى مبعرفش أركن العربية ؟؟ لا لا هو انا مفضوحة قوى كده ؟؟
إسحاق: لا بس أصل دى أصعب حاجه بالنسبة للستات عموماً ...
أنا: أوعدك هتعلم grin emoticon ده هدف فى الخطة الخمساتشارية الجايه ...
إسحاق: أكيد، ده مشوار حضرتك طويل جداً مره فى مره هتتعلمى وتبقى كويسه ..
أنا: أكيد فى أمل.
أخدنا الحديث وكلمنى على محل سكنه وعرفت إسمه وصنعته اللى بيشتغل فيها غير السواقه،وجينا عند نقطة فى حديثنا غيرت مسار كل حاجه .
إسحاق: بس إنتى عشرية قوى يا أستاذه، البنات اللى فى سنك تخاف تتكلم مع سواق تاكسى .
أنا: ما هو أنا مش بتكلم مع اى حد يا أستاذ إسحاق ، أنا ليه نظرة.
إسحاق: وإيه نظرتك فيا ؟؟
أنا: إبن بلد وجدع smile emoticon
إسحاق : لو مفيهاش قلة ذوق ممكن تحفظى رقم تليفونى واى مشوار فى اى حته أنا تحت أمرك حتى لو مش فى ورديتى هجيلك وأوصلك ..
أنا: ( فكرت فى سرى و قولت انا فى العادة مش باخد أرقام حد، بس مش هكسفه) طيب هات يا أستاذ إسحاق الرقم..
إسحاق : طيب لو مفيهاش قلة ذوق ممكن أتشرف بأسمك .
أنا: ماهيناز.
إسحاق: الله حلو قوى معناه إيه ؟
أنا : معناه بسمة القمر وهو فارسى.
إسحاق: بمناسبة البسمة أستنى أما أفرجك صور أولادى ميلاد وكارين وإيلاريا.. إيلاريا دى بقى آخر العنقود إسمها معناه البهجة أو البسمة ولسه كنت بعمدها فى الكنيسة يوم الجمعة اللى فاتت ، شوفى صورها ... حلوه مش كده ، أنا جبتلها فستان تعميد على شكل رداء ستنا العدرا ... يارب بنتى إيلاريا لما تكبر يبقى لها نصيب من إسمها زيك وتبقى كل حياتها بهجة ، أنا هدعى ربنا إنها تبقى زيك فى كل حاجة.
أنا : ربنا يخليك ، دى شهادة كبيرة ، أنا مستهالهاش، ربنا يخليلك إيلاريا وكل أولادك ويبارك فيهم .
إسحاق: إنتى تستاهلى كل حاجه حلوة كفاية إنك عيدتى عليا ، وحسستينى إن بلدنا لسه فيها خير ...
أنا: طبعاً لسه فيها خير طول ما فيها ناس زى حضرتك .
إسحاق : إحنا قربنا نوصل ، طيب أعزمك على حاجه ، أى حاجه .
أنا: لا إنت فى منطقتى أنا المفروض أعزمك على شاى .
إسحاق: لا أنا عايز شربات ، معاكى رقم تليفونى وندر عليا يوم فرحك أوزع انا الشربات smile emoticon
أنا : شكراً كلك ذوق smile emoticon
إستمر حديثنا فى حاجات متفرقة لحد ما وصلت.. وهو بيقولى مع السلامة مكانش عايزنى أنزل فعلاً ، كان بيعاملنى بمحبة وعشرة زى ما أكون اخته واتربينا سوا smile emoticonوكان رافض تماماً ياخد الأجرة لولا إصرارى الشديد.
إسحاق أول مره أقابله وإحتمال تكون الأخيرة، بس عمرى ما هنسى طيبته وجدعنته معايا
