أخلاق مفقوده

أعتقد أن الراجل بيفقد رجولته لحظة ما بيمد أيده على واحده ست، والبنت بتفقد انوثتها لما تتلفظ بألفاظ نابية وتشتم بكلمات مش بنسمعها غير على لسان البلطجية و المتشردين.

كمان الراجل بيفقد هيبته واحترامه لنفسه قبل احترام المحيطين ليه لو مكانش قادر يغض بصره ولا يميز الكلام اللى بيقوله فى حضور البنات والستات،أما البنت بتفقد كل رقتها وجمال روحها لما بتبقى بجحه ومبتختشيش ولا عندها حياء.

للأسف السلوكيات دى انتشرت جدا بين الشباب والبنات وخاصة في الجامعة. مناظر مقرفة وهزار بالأيد وتبادل ألفاظ قذرة داخل الحرم الجامعي اللى المفروض حرمته كمحراب علم لا تقل عن حرمه دور العبادة.

بجد ربنا يكون في عون كل اب وام عندهم اطفال هيربوهم في الزمن ده. هيتعبوا جدا فى مقاومة التلوث المجتمعى المحيط ومحاولة فصل أولادهم وعزلهم في تجمعات نضيفه.