العيله

يعنى ايه عيله؟؟ واحد هيرد ويقول يخربيت  أسئلتك الرخمه...عيله يعنى أسره ...هرد وأقوله لآ بصراحه افادك الله جيت التايهه....مفهوم العيله مش مجرد كلمه او أفراد تجمعهم صله دم وخصوصا فى مجتمعاتنا الشرقيه اللى لسه بتحافظ على القيم والاصول والجذور مقارنه بالغرب المتحرر من قيود الروابط الاجتماعيه...مش هقعد أقول نفس الكلام اللى بيتكرر من ايام الفراعنه عن الدفء والحنان الأسرى..لأ..انا هنقلكم الواقع المصرى بكل صراحه والمتمثل فى بعض المواقف من حياه أسره مصريه ومنها على سبيل المثال...ان الأب  يدخل المطبخ ويلاقى باب التلاجه مفتوح يروح مزعق بعلو صوته  ويقول انا لو بربى بهايم كانوا عرفوا ان التلاجه معمولها باب علشان تتقفل بيه ( وطبعا هنا تتجلى عبقريه الطفل المصرى لانه ساب باب التلاجه مفتوح لسبب الآ وهو انه يخلى المطبخ طراوه لان الجو حر هناك)..ولما الأم عيالها يجننوها ويطلعوا عينيها وتقولهم طيب استنوا عليا لما بابا يجى من الشغل وانا هقوله على كل حاجه يا عفاريت...وطبعا الاطفال بيدركوا بعد فتره ان الام مش بتنفذ تهديدها وتقول للأب لانه بيرجع ميت وهلكان من الشغل فبيبدا الطفل يقف قدام مامته ويتنح ويحط ايده فى وسطه ويقولها ( قوليله) واكيد بعدها بيطلع يجرى علشان لو مامته قفشته هتديله بالشماعه وفين يوجعك..........ودايما فى كل بيت تلاقى اخ او اخت سوسه ولئيم من تحت لتحت وطفل تانى غلبان بس صوته عالى جدا..يروح اللئيم ناكش الغلبان فيصرخ من هبله..الأم طبعا بتيجى جرى على صريخ الغلبان وتروح مدياله العلقه التمام والتانى يضحك نفس الضحكه الصفرا بتاعت كل علقه...ولما يروحوا يصيفوا والأم تقولهم كفايه بحر جسمكم هيتحرق وهما يا عينى محرومين من الميه والبحر طول السنه فميسمعوش الكلام وعلى آخر اليوم جسمهم كله يتحرق ومامتهم تقعد تحطلهم فى كريمات  ..وفى بدايه كل عام دراسى لما الاطفال يهجموا على باباهم ( بابا عايزين فلوس علشان الجلاد  والكشاكيل والاقلام) يروح الأب مبرطم فى سره كان يوم أسود يوم لما قولت يا خلفه ما انا كنت مرتاح من الهم ده ...بس أول لما بنته الصغيره تبوسه وتقوله بحبك يا بابا يستغفر ربنا بسرعه ويحمده على نعمته...أحلى حاجه بقى هى اللمه على سفره فى رمضان والأب اللى بيبقى على راس السفره ومستنى حد بس يعمل صوت وهو بيشرب الشوربه علشان يديله كلمتين فى جنابه من عينة أنت بتاكل مع بنى ادمين مش حيوانات .....بجد العيله معانى وأحاسيس كتير أتمنى متختفيش من حياتنا.