امبارح كان يوم من احلى الأيام فى عمرى...كنت فى حفل افطار جماعى للأيتام فى جامعه القاهره منظماه كلية العلوم...حد هيرخم بقى ويقول جامعة القاهره وكمان علوم !! ده ايه ده يابنتى ولا كليتك ولا حتى جامعتك!! هرد وأقول : عادى يعنى رمضان كريم بقى وعديها ومتقفليش على الواحده......المهم بقى بعد الافطار كان فى حفله للأيتام وجايبين دى جى ....انا قولت عادى بقى هيغنولهوم كوكو واوا وشخبط شخابيط...وفعلا بدات الحفله بشخبط شخابيط ...بس بعدها لقيت مقدم الحفله بيقول ان فى مسرحيه..كل اللى جه فى تفكيرى انها هتكون مسرحيه بتقولهم أغسلوا ايديكم قبل الأكل وأسنانكم قبل النوم والحاجات دى يعنى...لكنى فوجئت بحبوب الدبدوب اللى بيعيط ومقدم الحفله بيسأله انت بتعيط ليه!! قاله: أسد الغابه واكل اكلنا وشارب شربنا وسارق حلمنا...المقدم طلب من حبوب الدبدوب انه يستطاد الأسد وبالفعل حبوب استطاده وبدأت المحاكمه....وبمنتهى البساطه بدأوا يعرضوا للأطفال يعنى ايه محكمه وقاضى، وان شاكوش القاضى علشان يفرض بيه النظام مش علشان يدى المتهمين بيه فوق دماغهم زى ما معظم الاطفال كانوا فاهمين...ولما بدات المحاكمه انا اتصدمت ان الاسد بيقلد القذافى....قولت الله أرسولكم على واحد بقى القذافى ولا مبارك!! وكانت قمة الكوميديا انهم جايبين أسد جربان كل شويه يهرش والمقدم يقوله بطل هرش ...يرد الاسد ويقول: قملى وجربى وأنا حر فيه.......المهم بدأت المحاكمه وحبوب الدبدوب سأل الأسد أنت ليه كنت واكل اكلنا..رد الأسد وقال: خايف على شعبى من السمنه...قاله حبوب طيب وليه كنت شارب شربنا...رد الأسد وقال: ياعم دى حتى الميه ملوثه...قاله طيب وليه بقى كنت سارق فلوسنا..رد الأسد بمنتهى الأستهبال : أنتوا شعب مبذر انا كنت بحوشهالكم فى بنوك سويسرا...وكان السؤال الأخير من حبوب الدبدوب طيب ليه بقى كنت سارق حلمنا!!! السؤال ده أنا قعدت افكر فيه كتير جداجدا..هما ليه فعلا الحكام العرب مستكفوش بأكلنا وشربنا وفلوسنا لأ كمان سرقوا حلمنا.. وفى نهايه المسرحيه للتبسيط وصف حبوب بلدنا بعلبه اللبان وانه عمل كل اللى عمله مع الأسد علشان هو مش طماع ونفسه بس فى واحده لبان من العلبه...والغريب ان الأطفال أعمارهم بين سنتين وسبع سنين بس ماشاء الله متفاعلين جدا مع المسرحيه وحتى لما شغلوا اغانى وطنيه كانوا بيرقصوا عليها ومستمتعين جدا ..انا شايفه ان المسرحيه دى واللى كانت مليانه اسقاطات سياسيه من احسن الطرق غير المباشره للتثقيف السياسى للأطفال وزرع مبادىء الديمقراطيه فى نفوسهم..بجد شكرا لحبوب الدبدوب وشكرا لشباب وبنات كليه العلوم على المجهود الرائع اللى عملوه مع الأيتام وفعلا نجحوا فى رسم ابتسامه على وشوشهم البريئه وشكرا لصديقتى العزيزه اللى كانت السبب فى وجودى هناك.
واضح انها كانت حفله تحفه يا ماهيناز وعرضك ليها رائع
ReplyDeleteفعلا يا عمر كانت حفله اكثر من رائعه واتعلمت فيها حاجات كتير جداجداجدا
ReplyDeleteجزاكم الله كل خير ... لو كنت اعرف كنت جيت
ReplyDeleteجزانا واياك...اكيد انا عارفه بس والله انا عرفت قبلها بيوم واحد بس.
ReplyDelete