Malcolm X

محدش فينا ملاك وأوقات كتير بنكسل نصلى أو نصوم صيام تطوع بحجة إن النهارده حر ومش هنقدر نستحمل العطش ، بس إمبارح حصلى حاجتين عرفونى قد إيه أنا مقصره تجاه دينى . أول حاجه إنى إتعرفت على بنت باكستانيه مسلمه  إسمها زونيرا على الفيس بوك فى نفس سنى وماشاء الله عليها حافظه القرآن كله وأنا اللى لغتى الأساسيه اللغه العربيه مش عارفه أعمل كده وحاسه إن الموضوع صعب ، بس سألت نفسى هو مكنش صعب عليها ليه ؟ وكانت الإجابه الوحيده  المقنعه اللى جت فى دماغى إن إيمانها أقوى من إيمانى بمراحل.... تانى حاجه بقى ودى اللى خلتنى أبكى ، إن عندى جهل رهيب بالتاريخ الإسلامى وكل الكتب اللى بقرأها عن تاريخ آسيا ومصر الفرعونيه ، مش بقول إنها حاجه وحشه بس لما تيجى على حساب ثقافتى الإسلاميه ومعرفتى بشخصيات مسلمه غيرت كتير فى التاريخ يإيمانها يبقى كده أنا مقصره جداً ، سبب بكائى هو إنى كنت بقرأ كتاب إسمه ( أشهر الإغتيالات السياسية فى التاريخ منذ عهد الرسول صلى الله عليه وسلم  إلى اليوم  ) والكاتب هو المبدع  "إبراهيم سراج "  وكان الفصل بيتكلم عن  إغتيال شخص إسمه ( مالكوم إكس ) أو ( الحاج مالك شباز ) الإسم شدنى وبدأت أقرأ قصة حياة الراجل ده . إتولد مالكوم سنة 1925 فى الولايات المتحده الأمريكيه وكانت طفولته جحيم ، عيلته كانوا فقراء جدا  و أربعه من أعمامه ماتوا فى حوادث عنصريه علشان هما أمريكيين من أصل أفريقي ( حوادث العنصريه كانت فى الفتره ده منتشره وبتتم بصور وحشيه جدا ) و علشان المعاناه تكمل والده كمان إتقتل فى حادثه عنف عنصرى ومالكوم يادوب إبن ست سنين ، تخيلوا طفل عايش وسط كره وعنصريه وجريمه ممكن تتكون شخصيته إزاى ! طبعاً كان لازم يبقى مجرم بالفطره تبعاً للبيئه اللى نشأ فيها . وبالفعل سنة 1946 إتحكم عليه بالسجن 10 سنين وبعد سنه فى السجن قابل واحد إسمه بيمبى وده اللى كان ليه دور كبير فى حث مالكوم على الإطلاع على كتب التاريخ والكتب السياسية ، وبعد 5 سنين إتنقل لسجن تانى يقضى فيه باقى العقوبه وهناك جاتله رسالة من اخوه بيدعوه فيها لدخول الإسلام من خلال جماعه  مسميه نفسها " أمة الإسلام "  وكان قائد الجماعه دى إسمه " إليجا محمد " كان شيطان فى جسم إنسان ، كان مدعى النبوه ، كان بينشر تعاليم خاطئه للإسلام ومنها عدم الإيمان بكل ماهو حسى زى الملايكه والغيبيات ومش كده وبس لأ كان بيخليهم يصوموا شهر ديسمبر من كل سنه مع إلزام العضو بدفع عُشر دخله للجماعه كزكاه ، حاجه كده والعياذ بالله كُفر . وفعلاً إنضم مالكوم للجماعه دى وغير إسمه لمالك بعد تحوله للإسلام ( طبعاً فى البدايه إسلامه كان غير صحيح ) ومش كده وبس لأ ده بقى داعيه للجماعه وأسلم على إيده ناس كتير منهم الملاكم العالمى محمد على كلاى والأغرب إن كل قنوات التلفزيون فتحت له أبوابها وكان ليه مساحه كبيره جداً من الوقت علشان ينشر الدعوه للإنضمام للجماعه  ( سألت نفسى إزاى وأمريكا من قديم الأزل أكبر محارب لإنتشار الأسلام على أرضها وفى نهاية القصه عرفت سبب الحريه الإعلاميه اللى أخدها مالك فى الوقت ده  ) ومع الوقت زادت شهرة مالك وبقى الدراع اليمين لإليجا وتانى أكبر داعى لجماعة أمة الإسلام فى أمريكا . مالك مفقدش حبه للإطلاع مع مرور الوقت وفى مره من المرات كان بيقرأ كتاب عن الحج فى الإسلام وقرر إنه يروح ويأدى الفريضه وهناك كان أكبر تحول ممكن يحصل لأى إنسان ، تفتكروا بقى إيه اللى حصل لمالكوم هناك وهل مالكوم مات وهو فى الحج بسبب تطرفه ولا رجع أمريكا ومات هناك؟؟؟ ده بقى اللى هنعرفه فى الجزء التانى .