سيناء لليهود

كتير منكم سافر شرم الشيخ فى الأجازه ، وكتير منكم إشتغل هناك ، وكتير منكم برضه إتفتش فى الرايحه والجايه ولا الهربان من الخدمه العسكريه  ومش إتفتش بس لا إتبهدل فى التفتيش وشنطه إتقطعت من غشومية اللى بيفتش وإن مكانش هدومه كمان إتقطعت  ..... أنا بقى عمرى ماسافرت هنـــاك ولا شوفت جنة الله فى الأرض زى مابيقولوا عليها ... يمكن أكون بيجيلى هطل وتناحه لما بشوف صورها فى برنامج أو على النت ،  إيه ده ياعم  ميه وهوا ووجه حسن ( الوجه الحسن هناك إيه ..اللهم صلى على كامل النور مهما إستحمينا ونقعنا نفسنا فى كلور مش هنوصل لدرجه البياض دى ، بجد الشباب معذور يعنى لما يبصلنا من فوق لتحت  ) وقال إيه شعاب مرجانية و رحلات غوص شويه وهيقولوا فى عرايـــــــــــس بــحـــــــــر وجنيات تحت الميه بتدى بونبونى  للأجانب علشان تشجع السياحه ، ولا الفنادق يا أخويا إيه ده !! هو فـــى الحاجات دى فى مصر بصحيح ولا الناس دى بتشتغلنا ...أصل اللى يشوف الدويقه والسيده عائشه والمقطم وشق التعبان إستحاله يصدق إن مصر فيها أماكن نضيفه كده . أنا حاسه إن المقدمه فردت منى حبتين وإنتوا بدأتوا تزهقوا ، أوبا أهو واحد بيقول صدعتينا إنجزى مش كفايه إننا بنقرأ التخاريف دى  ، خلاص ياعـــم متزقش هقول أهو الكلمتين اللى فى نفسويتى وغايظينى ، أنا غايظنى إنى أكون فى السن ده وأعرف كـــتير عن دول أسيا وإنقساماتها وجغرافية أرضها ومعرفش تقسيمة سيناء اللى حتة من بلدى ( أو زى ما كنــــــت فاكرة إنها حتة من مصر بس كنت غلطانه)  سيناء للى ميعرفش متقسمه 3 مناطق وفقا لإتفاقية كامب ديفيــد ( إتفاقية الخيبه والندامه )  على فكرة أنا مش ضد إقامه علاقات معاهم لإن إسرائيل بالفعل كيان عسكــــرى وإقتصادى فى المنطقه وليه تقله كمان ....كلامى ده هيزعل ناس كتير وخاصة الشباب المتحمس لحـــــلــــم تحرير القدس والوحده العربيه وإن اليهود أصلهم كان العراق مش فلسطين والكلام ده ، بس ياريت نفكــــــر بدبلوماسية وتعقل وحكمه ، الناس دى عندها  نووى يقدر يفجر الوطن العربى كله ومفيش دوله عربيــــــــه واحده عندها ربع السلاح ده .... أنا اللى ضده بجد هو لوى الدراع اللى بتمارسه علينا مامـــــا أمريكــــــــا والأتفاقيات اللى بنوقعها مع إسرائيل غصب وإقتدار علشان ناخد معونة ماما أمريكا ، زى إتفاقية الكويـز وغيرها وغيرها ، المهم بقى لازم كلنا نعرف إيه هما التلات مناطق اللى سيناء متقسماهم . منطقه ( أ )     و ده الجزء الموازى لقناة السويس  وبيسمح فيها بوجود فرقة مشاه واحده وأفراد ميزيدش عددهم عن 22 ألف فرد .. منطقه (ب) ودى معظم مساحة سيناء وبيسمح فيها بوجود 4 كتايب بأسلحه خفيفه ( بتعور بس مبتموتش يا فرحتى بيكو وبالواوا ) وأفرادها ميزيدوش عن  4000  .. منطقه (ج)  ودى الحدود مع فلسطين  (اللى كانت فلسطين أو اللى باقى من فلسطين) ودى ممنوع الجيش يدخلها ولا طيراته تطير فوقها مسموح فيها بس بالشرطــــــه المصريه وكمان إيه أسلحه خفيفه من بتاعة الواوا برضه ...يعنى التوتاله  26000 جندى مجند بأسلـــحة الواوا وكام نفر شرطة بأسلحة الواوا برضه ( فالحين بس تضربونا بالقنابل المسيله للدموع ومدرعاتكــــــم تدهسنا ده اليهود أحسن مننا بتدوهم بالواوا وعلشان كده هتافنا الجديد هيكون ...الشعب يريد أسلحة الواوا ) بجد يعنى مزهله أيون مزهله مش مهزله لإن اللى إحنا فيه عدى المهازل بكتير  ، وفوق ده كله طابا اللى كل شويه تطير عليها طيارات إسرائيليه بجحه الانفاق ومطارده المهربين ( هأو هأو وكمان هأو ) أنــــــا سايبلكم الحكم هل ده يرضى ربنا ؟؟