ساحرة الأمانى

الكلمتين اللى جايين دول هيزعلوا ناس كتير منى بس معلش إستحملونى وسيبونى أبعبر عن رأيي ...يعنى هى جت عليا أنا ..ما الكل عمال يقول رأيه على الفضائيات حتى أم حماده لما أستضافوها على خالتى اللتاته تى فى، أبدت رأيها فى إرتفاع أسعار السلع الغذائيه مع إقتراب عيد الأضحى معلله هذا الإرتفاع  بنق وقر أم حنان العيد اللى فات لما قالت إن الخرفان كتير السنه دى والبلد مليانه خير ( قرها دكر أم حنان دى)....المهم بقى من غير رغى أنا بصراحه عندى حاله إكتئاب وإحباط عام من الأوضاع اللى إحنا عايشين فيها دى... أفتح عينى الصبح على جرايد ومجلات نصها بيهول والنص التانى بيهون مفيهاش جريده واحده بتنقل الحقيقه بوضوح وصراحه  أقول بلاش قرف على الصبح أفتح النت على اساس انى أشوف فيديو عبيط أو ألعب لعبه أون لاين هبله من اللى بيجيبوا تخلف عقلى علشان انسى مرارة العيشه   الآقى  حد عامل شير لخبر كله تأليف ويسم البدن على الصبح ( يقطع النت على النتيت) أروح قافله الكمبيوتر ونازله  الجامعه  ..وانا فى الطريق بقى خدوا عندكم ...الناس اللى فى الشارع كله بيفتى فى كل حاجه وفى اى حاجه..أركب الميكروباص يروح السواق مشغل محطه راديو مصر  اللى بتذيع اخبار إنهيار البورصه وإننا بنسحب من الإحتياطى وشويه وهنشحت(قال يعنى الثقافه مقطعه بعضيها ماله شعبولا وبعرور!!)...أحط السماعات فى ودانى واشغل أغنيه أطفال هبله  وأعيش دور العته الطفولى المتأخر ويادوب أرفع عينى وابص من الشباك الآقى إعلانات الأحزاب اللى داخله فى الإنتخابات واللى نص مؤسسيها من الفلول وطبعا كلها تحت مسميات متاجره بالثوره، أوصل الجامعه الآقى  التيارات السياسيه المختلفه حاطه ملصقات بيرحبوا بالطلبه الجدد وبيدوهم هدايا ومنشورات لإستقطابهم(زى مانكون  فى مجلس الشعب مش  حرم جامعى ليه قدسيه المسجد والكنيسه ) ،( ماخلاص مبقاش فى حرس جامعى ، أنا مش ضد إن الحرس كان مزودها وبيتدخل كتير بس انا ضد سحب صلاحياته كلها وضد إنه يمشى من الجامعه لإنى بقيت بشوف مناظر يستحيل كانت تحصل فى وجودهم) أسيب كل ده وأدخل المحاضره الآقى نفس الدكاتره اللى نصهم ركب الموجه بعد الثوره على الرغم من إن اغلبهم متعين وزايط بالوسايط ( بس مش الكل اكيد فى دكاتره محترمين ) بييجى أخر اليوم وبحط راسى على المخده ببقى حاسه إن دماغى هتنفجر وإن مخى بيسيح....آيوه عارفه إن الإستقرار على الساحه السياسيه والأمنيه مش قبل سنتين وعلى الساحه الإقتصاديه مش قبل 5 سنين على الأقل إن ماكنوش 10 سنين، بس عارفين أنا ليا حلم بسيط ونفسى أحققه بس فى الظروف دى محدش يقدر يحققه غير مارد أو عفريت او يمكن ساحرة الأمانى.(ياساحرة الأمانى عندى احلام كتيرلكن فى حلم واحد أرجوكى تحققيه....نفسى أكون إنسان قلبه مليان حنان ... يتنفس الحريه... رافع راسه بأمان ... عايش عيشه هنيه  مش حانى  ضهره جبان.... ياساحرة الأمانى حلمى  بيبان كبير لكنه حلم غالى من فضلك حققيه.)