بقالى إسبوع بعانى من آلم فظيع فى ضرس العقل
..قال إيه الضرس بيستهبل ومش راضى يطلع ( حتى الضرس أدرك إنى مجنونة ومش عايزة
أعقل ... ما هو صحيح أنا أصلاً عاجبنى حالى كده ... مبدأى فى الحياة بسيط جداً ....
إعمل عبيط وسيب الدنيا تزيط ... طيب
والله ما فى بلاغة أكتر من كده فينك يا متنبى فينك يا ابن المقفع ) المهم بقى بقالى إسبوع مش عارفه أحط لقمه فى
بقى ولا أشرب حتى المياه ... كلمت دكتور الأسنان أحجز ملقيتش حجز فاضى غير يوم
الثلاثاء ( غالباً هو هيشق جزء من اللثه علشان يسهل نمو الضرس لإن فكى ضغنون ...
أيون ضغنون حد عنده مشاكل .. الآنسه اللى
ورا بتضحك ليه !!! والإستاذ اللى على اليمين بيمصمص شفايفه ليه !!! إمبارح بقى جبت
آخرى وكنت ببكى من الآلم ( أصل بعيد عنكم آلم الأسنان غير محتمل ) بمنتهى الذكاء
تجاهلت الحكمة المأثورة اللى على قفا كل علبة دواء واللى بتقول ( تحت إشراف الطبيب
..أو بعد إستشارة الطبيب ) وبلبعت قرص
كتافلام ... وبعد نص ساعة أجاركم الله على
الحصل ..جاتلى حالة جرب وبقيت بهرش فى وشى وفى إيدى زى المعفنين اللى ماشافوش
حمامات ولا حموم من ساعة ما إتولدوا .. جريت على الحمام وغسلت وشى ..برفع وشى وببص
فى المرايه ... ياخرابـــــــــــــــى .. يالـــــــــــــهوى ...يا مـــــــــا
مــــــــــــا .... يابولـــــــــيــــــــس ... يا شاويـــــــــــش .. وشى بقى
شوارع يا رداله ....أحمر ومنفوخ زى البطيخة الصالحاوى ... وشى راس مالى ..إهىء
إهىء إهـــــــــى ......... عــــــــــــــا عــــــــــــا ( آه أنا البنت اللى
لما بتتصدم بتعيط زى البقرة .... مش من البنات اللى بيمسحوا بمنديل ويتنهنهوا )
المهم بابا كان فى مشوار بره .. جريت على الست الوالدة سرعتها ...أماما وشى أماما
.. ( مش هقول إنى جميلة وبتاع ومفيش بنت فى جمالى .. لأ الحمد لله يارب أنا عادية
جداً وراضية عن شكلى لإن ربنا مش بيخلق
حاجه وحشه ..إحنا اللى بنوحش فى نفسنا ) ماما يا عينى جريت وأخدتنى لمركز طبى قريب إسمه مركز الحياة ( آه إعلان للمركز ..المقال
مقالنا والمدونه مدونتا محدش ليه عندنا حاجه .... واللى عايز العنوان يقول فى تعليق
وأنا أقوله ) بصراحة الدكتور كان شاطر بس عمل اللى كنت خايفه منه .. البعبع
...إنها الحقنه أحبائى ( آه طويلة .. آه بيقولوا قربت أتم الواحد وعشرين سنه ..بس
لما الحوار يبقى فيه حقن يا فكيك ..بخاف منها ياناس مبحبهاش متعقدة منها ... مش فى
فيلم صغيرة على الحب صلاح كان عنده عقدة
الطبيخ أنا بقى عندى عقدة الحقن ) أخدتها وأنا مغمضه عينيا ومضطره ( كله فى سبيل
إن وشى يفش .. طيب وربنا كنت شبة الفضائيين فى حرب النجوم ) الدكتور كتبلى على كذا
دواء علشان أبطل هرش زى الجربانين ..بس الحقنه بقى خلتنى أنام فى ثوانى ..وإحنا
راجعين أنا أصلاً كنت نايمة فى العربية ( إفتكرت لما كانوا بياخدونا لحقن التطعيم
وكنت بعيط وجسمى يسخن وبعد كده أتخمد أنام فى كنبة العربية ..أيام بقى ) ياجماعة
فى الآخر أدركت إن الأقوال المأثورة بتاعة شركات الأدوية اللى على قفا علب الأدوية
مهمة وليها معنى ...ياريت تركزوا فيها لحسن يجيلوا جرب زى أختكم .... الحمد لله
كما ينبغى لجلال وجهك وعظيم سلطانك ..المرض إختبار وأنا الحمد لله حمدت ربنا على
الإبتلاء ...
No comments:
Post a Comment