وقفه حتميه

الصورة دى مر عليها 4 سنين، لسه فاكره اليوم ده كويس، كنت مرهقة جداً فى آخر أيامنا فى مكة قبل الرجوع للقاهرة ومع ذلك أصريت أقعد مع بابا فى الحرم ونوصل بين الصلوات بالعبادة من غير ما نرجع الفندق.. على الرغم من أنها مكانتش اول عمره لينا بس مع الأسف واجهنا فيها صعوبات كتير أغلبها كان بسبب شركة السياحة وسوء تنظيمها للرحلة.. أنا وبابا يومها إتكلمنا فى حاجات كتير ودعينا كتير ممكن اكون مش فاكرة كل التفاصيل بس اللى فاكراه كويس جداً كم المتعة اللى حسيت بيها يومها، مريت بلحظات من صفاء البال والنقاء الروحى تعتبر من أندر اللحظات اللى أى بنى أدم ممكن يمر بيها فى حياته كلها بدون مبالغة، راحة نفسية معاها بتنسى كل همومك وبتفضى دماغك، محدش بيوحشك، مبتقلقش من بكره، مبتزعلش على حاجه، مبتتمناش إن اللى إنت راسمه لنفسك يتحقق بسرعة، بتبقى كائن نقى لأقصى الحدود، بنى أدم شفاف روحه خفيفة وراضية.. مؤخراً أنا بفكر كتير وبحسب حسابات كتير وبعمل مليون خطة بديلة بسبب إن فى ظروف كتير مخليه كذا محور فى حياتى مش مستقر، كل يوم قبل ما أنام بمسك القلم والورقة وأكتب قائمة طويلة عريضة بالإلتزامات اللى لازم تخلص قبل نهاية اليوم اللى جاى ،كل يوم بصحى وأنا حاسه إنى مأخدتش كفايتى من النوم بسبب إنى حتى ساعات نومى بحسبها علشان متجيش على حساب إلتزام تانى.. أظن إنى مش لوحدى اللى بعمل كده، أغلب اللى فى سنى بيعملوا كده ولازم يعملوا كده علشان الهدف الأساسى من وجودنا هو إعمار الكون والسعى بشتى الطرق، محدش نفسه يموت وإسمه يموت معاه، محدش نفسه ميسبش وراه أثر علشان لما يموت عداد الحسنات ميوقفش ويفضل شغال، بس مع كل ده لازم وقفه، لازم استراحة، لازم من فترة للتانية نتأكد إن إحنا ماشيين فى السكة الصح والباطل مغطاش على الحق جوانا وإحنا مش واخدين بالنا، ربنا ينور بصيرتنا كلنا ويستخدمنا ولا يستبدلنا...

اللهم يسر لنا عمره عاجلاً وليس أجلاً