حتى لا يضيع العمر

هقول كلام قد يكون بيدور فى عقول بنات كتير جداً، بس معندهمش الجرأه إنهم يصرحوا بيه . كل ما زاد طموح المرأة الشرقية وإرتفع سقف تطلعاتها كل ما زاد خوفها من الإرتباط ، كل ما حست إن حريتها هتتقيد ، وكل ما زاد تمردها وعنادها. لما يجيلها عريس عن طريق جواز الصالونات بالطريقة التقليدية تلاقيها بتبادر بهجوم عنيف على أسرتها ، بترفض فكرة إن واحد ميعرفهاش وفى الغالب عمره ما شافها قبل كده يعاينها زى ما بيقولوا علشان يقرر تنفع ولا متنفعش ، حلوة ولا مش قد كده . بتوصل مع أسرتها لمرحلة الصراع القائم على وهم فى دماغها هى وبس ، وهم إنهم عايزينها تتجوز بغض النظر عن اللى هتتجوزه ده مناسب ليها ولا مش مناسب ... مفيش أهل بيكرهوا أولادهم ، مفيش أم وأب عايزين بنتهم تعيش تعيسه ، بس أوقات حبهم الزايد وخوفهم بيترجم بشكل خاطىء . بتمر السنين على البنت الشرقية الطموحة وبترفض عريس ورا عريس وبتزيد الضغوط عليها من المجتمع بتوصل لمرحلة ممكن نسميها مرحلة الإستسلام ،الأهل فى المرحلة دى بيتقسموا نوعين ، النوع الأول بيفقد الأمل فى إن بنتهم يكون ليها أسرة وشريك يدعمها على الحلوة والمره وهنا الكل بيستسلم ويرضى بالأمر الواقع ،أما النوع التانى من الأهل بيضغط على البنت لحد ما بيوصلها لمرحلة الإنهيار وساعتها هى بس اللى بتستسلم وبتقبل بأى شخص علشان الناس تسكت وتبطل تقول الكلام المتخلف بتاع فاتها قطر الجواز وعنست ..البنت قبل ما توصل للمرحلة دى بتمر بمرحلة خطيره بيتحول فيها ذكائها لغباء شديد ..و بتعتبرالمرحلة دى هى سبب وصولها المباشر لحالة الإكتئاب وفقد الأمل فى مرحلة الإستسلام، المرحلة اللى أقصدها بتبدأ لما البنت بالفعل تعجب بشخص وهو كمان يعجب بيها بس بتخاف تصرح ، فاهمه أن تصريحها ده ضعف ، أو إنه هيقلل من قيمتها وإحترامها لنفسها ، ردود أفعالها بتكون فى منتهى الحده بل تصل للتجاهل بشكل وقح فى بعض الأحيان وبتكون النتيجة إن الراجل بيترجم رودو أفعالها على إنها رفض لشخصه وعدم إحترام لرجولته وإهانه لكرامته وبتنتهى الحكاية بإن الراجل ينسحب بهدوء .. مقاومتها وخوفها ورد فعلها لما بيتكرروا كتير بيوصلوها لمرحلة الإستسلام . بلاش تخافوا ، متوصلوش نفسكم لمرحلة الإستسلام ، بطلوا مقاومة وعند قبل ما توصلوا لمرحلة الإكتئاب ، متفقدوش طموحكم ولا تتنازلوا عن أحلامكم ، بس لما تلاقوا فرصة أو تقابلوا الشخص اللى فعلاً ممكن يساعدكم على تحقيق الأحلام دى بلاش تضيعوه ، وصدقونى فى نوعيه رجاله هتقابلوهم فى حياتكم مره واحدة بس ومش هيتكرروا تانى .. وعمركم ما هتنسوهم أبداً ....