شارع 7

 أنا مش جبانة، بس بخاف أو بمعنى أدق بقلق كتير ، ومش عيب إنى أعترف بده ، لإن ده معناه إنى محافظة على أدميتى وسط عالم ملوث . للأسف معظم الوقت شاغله تفكيرى بالمستقبل لدرجة إنى كتير بنسى أستمتع بالحاضر. واحد من اكبر مخاوفى هو الخوف من التغيير ، عندى صعوبة فى التأقلم وتخطى أشياء أتعودت عليها وخصوصاً الأماكن، بتعلق بالأماكن أكتر من الأشخاص. من حوالى 4 سنين لما عزلنا من البيت اللى اتولدت واتربيت فيه كان عندى إكتئاب شديد وكنت طول الوقت بخلق اى حجه علشان اروح عند البيت القديم وأمشى فى شارعنا ، كنت براقب البيت من بعيد ، براقب  المحلات اللى كنت بتعامل معاها ،  براقب مدرستى القديمة  وبتمنى أقابل حد من أصحاب الطفولة صدفة وأنا ماشية. لما البيت القديم إتهد حته من روحى ضاعت معاه، اتردمت تحت التراب وهما بيكسروا أخر حيطه فى البيت. حاولت كتير أتأقلم  وأتقبل فكرة إنى أتنقلت لحى من منظور ناس كتير أرقى وأهدى ، على الرغم من إنى  كنت شايفاه ميت ، مفيهوش ود زى حينا القديم ، مفيهوش جيرة ومحبة ودفا . مع الوقت إتعرفت على جيران لطاف خلونى أتقبل الحى الجديد ، كونت صداقات وتخطيت حنينى للأشخاص بس فضل حاجز شوقى للمكان اللى ليا ذكريات فيه مانعنى أتغلب على خوفى من التغيير، مؤخراً إكتشفت طريقة لطيفة تخلينى أتأقلم بشكل أسرع ،لما أدركت إنى لازم أخلق ذكريات جديدة ..بقيت كل ما أحسن إنى مخنوقة أنزل أتمشى فى شارعنا،  ومع الوقت إكتشفت إنه فيه مميزات كتير زى مثلاً إنه هادى ومليان شجر وسهل جداً تشوف الأهرامات من زوايا كتير، والاهم من كل ده أنه بدأ يكون ليا ذكريات فى كل ركن وناصية فيه، ذكريات البونبونى اللى بوزعه على اولاد البوابين وانا بتمشى، ذكريات الورد اللى بستمتع بجماله وبحتفظ بصورة ، ذكريات آيس كريم الشوكولاته اللى بجيبه فى السكرته وبخرب بيه الريجيم ، ذكريات روحى اللى بدات تتعلق بشارع 7 ، شارعنا الجميل ....