أم إسماعيل

فاكرين مقولة اللغة الإنجليزية اللى بتقول" كن صديقاً لمن ليسوا فى مثل عمرك ، إقضى وقتك مع أشخاص لايتحدثون لغتك الأم ،تعرف على أشخاص من مستويات إجتماعية مختلفة عن المستوى الذى نشأت فيه .هكذا ترى العالم على حقيقته ، هكذا تنضج وترتقى" ، طيب بلاش دى ، انتوا لسه فاكرين عم صابر ؟ صديقى اللى أكبر منى بخمسين سنة ؟؟  للى مش فاكر او مقراش الجزء الاول ،عم صابر كان أول تجربة إنسانية عملتها كتطبيق للجزء الأول من المقولة والمتعلق بتكوين صداقات مع ناس مش فى نفس عمرى، النهارده بقى عايزة أحيكلكم عن تانى تجربه واللى كانت تطبيق للجزء التالت من المقولة من خلال التعرف على أشخاص من مستوى إجتماعى مختلف عن اللى نشأت فيه . أم إسماعيل ست فى منتهى اللطف والبشاشة، مهما كنت مهموم أو حزين ضحكتها الصافية بتجبرك إنك تبتسم من قلبك. أم إسماعيل عندها فرشة خضار صغيرة فى سوق شعبى، وأنا بشترى منها الخضار وبعد أسابيع من البسمات المتبادلة دون خروج عن سياق عملية البيع والشراء المعتادة ، قررت أخيراً أنكشها :

أنا: إيه يا أم إسماعيل مالك محلويه كده اليومين دول ؟ الله أكبر عليكى، ما تقوليلى السر يمكن يحوق معاياو اتجوز وأبويا يخلص منى ..

أم إسماعيل : ( ضحكة ممزوجة بخجل) الله يحظك يا أبله ، مانتى زى الفل اهو ، انتى بس اللى عينيكى حلوة فشيفانى كده ، ده الزمن هدنى ، ياريتك كنتى شوفتينى وانا بنت 17 ، كنت ببرق كده ..

أنا : لا يا ستى إنتى بتغزى العين بس، متخافيش مش هحسدك ، قوليلى سر بسمتك الحلوة دى إيه ؟

أم إسماعيل : الحمد لله على كل حال يا أبلة، ده نعمة الستر دى لوحدها تخلينى مبطلش أبتسم لحد ما اموت .

أنا : ونعم بالله ، قوليلى بقى إنتى مبسوطه ، أقصد مرتاحة فى عيشتك ؟

أم إسماعيل : يا أبلة محدش مرتاح فى عيشته ، أنا صحتى رأس مالى وعافيتى هى كل ما أملك، ضحكتى دى بحارب بيها خوفى من بكره ، خوفى على عيالى اللى أبوهم مات وسابهم فى رقبتى ، خوفى للبلدية تكرشنا من السوق وتاخد فرشتى ، خوفى من البلطجى لو مجمعتلوش الإتاوه فى الميعاد ، بس تصدقى أنا برضه أحسن من غيرى ياما ، صدعتك أنا بهمومى معلش .

أنا : لا أبداً يا حبيبتى ، أنا بس بفكر إنتى جدعه قد إيه ، يارب أقدر أعافر زيك ، أنا كمان خايفة من بكره، خايفه مقدرش أحقق اللى نفسى فيه ، خايفه أتكسر ، خايفة أقع ومقدرش أقوم من تانى .

أم إسماعيل : عارفه يا أبلة ، كل واحد شايف همه أكبر هم فى الدنيا ، بس زى ما بيقولوا اللى يشوف بلاوى الناس تهون عليه بلوته ، إنتى لسه صغيرة وياما هتشوفى ، خديها نصيحة منى زى أختك ، متسيبيش أى حد مهما كان غالى عليكى يكسر قلبك ولا يوجعك، متسمعيش اللى بيقولك هتعملى إيه يعنى زيادة عن اللى قبلك ، لا إنتى تقدرى تعملى كتير طول ما ربنا راضى عنك ومبتعصيهوش ، سندك ربنا ومن بعده نفسك ، لا جار بينفع ولا قريب بيشفع .

كلام أم إسماعيل رن فى ودانى وإتكرر مئات المرات، قد إيه الست البسيطة دى عندها حكمة وعمق فى كلامها أكتر من ناس معاهم شهادات لا حصر لها . بعد كلامى معاها قررت مخليش حد يحبطنى ولا يوجع قلبى ولا يكسر روحى. قررت اعتمد على نفسى وأستقل أكتر من اى وقت فات، قررت أطبطب على نفسى وألجأ لربنا لما أزعل علشان محدش هيكون احن عليا منه ، قررت أعافر لأخر يوم فى عمرى .