العقل البشرى

معجزة العقل البشرى مستحيل نقدر نستوعبها بشكل كامل، ربنا خلقنا بعقول مُعقده جداً ونسب ذكاء مُتفاوته وإدراك ووعى بيتفاوت حتى بين التوأم المتماثل.. من أكتر الحاجات اللى بتبهرنى فى العقل الإنسانى هى الذاكره. ممكن نفتكر مئات الأسامى والاف الوشوش وملايين الروائح بس الأحاسيس والمشاعر هى الحاجه الوحيده اللى مع الوقت يا أما بتزيد حدتها بشكل كبير أو بتتلاشى تدريجياً .. أفتكر معايا أول يوم فقدت حد عزيز عليك أو مات إنسان قريب من قلبك، أكيد الدنيا إسودت فى عينيك و فكرت إن الحياة وقفت ومش ممكن تستمر من غير وجود الشخص ده، لكن فى الحقيقة مع مرور الأيام المشاغل بتلهيك وشده إحساسك بالوجع بتقل تدريجياً، مش بتنسى الشخص اللى مات بس بتنسى شويه بشويه إحساسك بالمرارة والوجع الشديد وبتندمج من تانى فى دوامة الحياة.. ممكن حته من روحك تتكسر أو تفقد جزء من مرحك وبهجتك بس أكيد مش هتبطل تضحك أو على الأقل تبتسم .. ربنا رحيم جداً وعلشان كده خلانا ننسى، ننسى الوجع والحزن، ننسى الحسرة والقهر، ننسى الندم وإلا كانت حياتنا هتبقى مستحيله وإحنا عايشين بنأنب نفسنا على ذنب إرتكبناه فى حق حد أو فى حق نفسنا فى يوم من الأيام.. ومن نفس المنظور الفرح كمان بننساه، الفرح مش سنين بنعيشها ولا أيام ولا حتى ساعات.. الفرح قصير، الفرح لحظات ولو معرفناش نستمتع بيها وقت لما تيجى هنبقى خسرنا كتير جداً، لو متعلمناش نفضى مكان  طاهر ونضيف ونقى جوه قلبنا  علشان نخزن فيه اللحظات الحلوه اللى بنعيشها، يبقى ضيعنا عمرنا من غير ما نعيش، أصل العيشة مش نفس طالع ونفس داخل وأكل وشرب وشغل بس، العيشة أمل وحلم وفرح وصبر، العيشة حلوة بس إحنا نفهم إن البسمة صدقة ونشر السعادة عبادة..