فجرنى شكرا

حد فيكم سأل نفسه قبل كده هى حركه طالبان اسمها طالبان ليه؟ طيب هما مين الاتنين دول اللى رعبوا العالم ولا مستر اكس؟؟؟؟طيب هما طلبه ثانوى ولا جامعه يعنى؟؟ولا ايه نظامهم بالظبط؟؟انا بقى اقولكم مين هما الطالبان  اللى خلوا ماما أمريكا هى وولاد العم سام يصرفوا بالهبل ..اشى بمب وصواريخ ونووى وأرض- جو ..وأرض-أرض  وحاجات عجيبه كده بعد تفجيرات  برج التجاره العالمى فى 2001 ..وكل ده على حاجه اسمها (ناشيونان سيكروروم) ...............................National security ولما سألت البتاع ده بيتاكل حلو ولا حادق ...قالولى ده مش بيتاكل خالص ده حاجه كده زى اللجان الشعبيه اللى عملها رجالتنا فى كوم أبو نموس أيام الثوره لحمايه عيالهم وبهايمهم مع الفرق ان ماما أمريكا بتحمى بهايمها..أقصد عيالها وبهايم  أختها  يوووووه أقصد ولاد  اختها أم سام اللى هى مبرشطه من سنه 1948 على اخواتنا فى فلسطين...المهم بقى طلعوا الطالبين دول من أفغانستان وكبيرهم واحد معلم كبير اسمه الملا عمر( ايه شغل السراير  ده بقى) طلعت كلمه الملا دى لقب عندهم ويعنى درجه معينه فى الجماعه...ولما سألت عم زمان عن الجماعه دى وعن تاريخها وعلاقته بأصل الشرق الاوسط والادنى ...اتنهد وقال ...كنتوا احسن البشر..كنتوا الحضاره..كنتوا العلم..كنتوا المدنيه والديمقراطيه..بس فجأه بدأتم تتأخروا..وتتقسموا وتتفرقوا..شويه منكم قالوا هنعمل جماعه ونسميها طالبان علشان نرجع قيم الاسلام وهيكون انطلاقها من الشرق وبالاخص أفغانستان...ازاى وهى أكبر دوله منتجه ومصدره للأفيون..ومش اى أفيون ده الأفيون الأفغانى ده أحسن صنف فى السوق..منين عايزين  يصلحوا العالم ومنين مش عارفين يصلحوا نقطه انطلاقهم..وبعدين بصراحه بقى مشكوك فى ان مصدر تمويلهم هو تجاره الافيون وبيع السلاح..هو مش برضه الاسلام حرم الاتجار فى السلاح والمخدرات. لما سمعت كلام عم زمان اتعاهدت بينى وبين نفسى انى ان شاء الله هربى أولادى على  الحب على الخير على الاعتدال و على تقبل الاخر والاتحاد ....على تعاليم دينى الوسطيه المعتدله..اللى تخليهم خير  سفراء مش لدينهم بس لكن لأى كتاب سماوى تانى  بيقول ان فى ربنا ..لانه مهما  اختلف اسم ربنا من كتاب لكتاب هو موجود ومؤمنين بيه.