رمضان

 ليه كل لما بنكبر فر حتنا برمضان بتقل؟؟ يعنى مثلا زمان واحنا صغيرين كنا بنستنى رمضان من السنه للسنه علشان الفانوس والبمب والصواريخ..وزمان طبعا كلكم فاكرين ماكنش فيه الفوانيس الصينى اللى بتغنى وترقص والفوانيس الى على شكل توتوك وشعبان عبد الرحيم وحسن شحاته وزكيه زكريا..لالالا خالص كان اخرنا الفنوس المصرى النحاس ابو شمعه وزجاج ملون ويوم لما يجبولك شمعه ملونه احمر ولا ازرق يبقى يوم سعدك...وتصدقوا على رغم من  بساطه تصميم الفانوس الا ان فرحتنا بيه كانت كبيره جدا..هل لاننا كل اطفال واى حاجه بتخلى الاطفال يفرحوا؟؟؟ ولا لأن الحياه كانت ابسط ومش معقده زى دلوقتى؟؟وفاكرين كمان لما كنا بنعطش او نجوع ونروح واكلين او شاربين سرقه كده فى الخباسه(محدش يقول انه مكانش بيعمل كده لان كل الاطفال كانت بتعمل كده) وفاكرين اولاد الجيران لما كانوا  بيخبطوا على بابكم(يخبطوا مين دول كانوا بيرزعوا برجليهم) علشان يلموا فلوس يزينوا العماره والشارع بيها..ولا كارتون رمضان..ياااااااااااه اكتر حاجه كنت بستناها من السنه للسنه كانت بوجى وطمطم وكنت ببقى مستمعه جدا وانا بشوفه وبخلى كل البيت يشوفه اجبارى من منطلق انى  اصغر واحده فى البيت وكلامى هو اللى يمشى ولما كبرنا شويا كان فى بكار بسماره ولونه مصرى..على فكره انا الى الان بتفرج على سنوحى وظاظا وجرجير..مش عيب عادى جدا....وفاكرين اول يوم رمضان ولمه العيله...وكميه العزايم اللى بتحصل فى الشهر ده وبطنك لما تتنفخ وتبقى زى البلونه بتعمل صوت لما تتطبل عليها من كتر شرب المياه...ولا الاكلات اللى الست الوالده  مبتفتكرهاش غير فى رمضان زى صينيه الفول بالبيض وكميات الزبادى اللى تغرق بوركينا فاسو كالسيوم لمده سنه..وفاكرين اغانى رمضان ..دى دنيا لوحدها..على فكره بقى الاغانى القديمه هى اللى بتحسسنى برمضان..بحس من جوايا لما يسمعها باحساس قوى وجميل..لكن الاغانى الجديده بحس باحساس ضعيف او مشوش زى مايكون حاجه بتأثر على الارسال او الاريال بتاعى مش مظبوط..وفاكرين قبل المغرب لما الشوارع  بتبقى واقفه ومش بتتحرك وساعه الاذان الشباب يوزعوا بلح على الناس  وبعد الاذان بحوالى ربع ساعه الشارع بيبقى مفيهوش اى حد ......وطبعا محدش يقدر يبنسى اخر 10 ايام فى رمضان والكحك والبتيفور والغريبه اللى مامى عمرها ما عملتهم فى البيت لانها بتشتغل..بس تيتا الله يرحمها كانت دايما بتعملهم....وكمان فاكرين زنقه الشوارع فى اخر 3 ايام قبل رمضان علشان الناس كلها بتجيب لبس العيد..اموت وافهم حبكت اخر 3 ايام معندكم شهر بحاله..شعب يموت فى الزنقه صحيح..واكيد محدش يقدر ينسى اغنيه صفاء ابو السعود اهلا اهلا بالعيد واغنيه ام كلثوم ياليله العيد اللى بتحسسنى ان لسه فى خير فى قلوب الناس وان مهما حصل هنفضل نحب بعض بجد...كل سنه وأنت طيبين..رمضان كريم.