Tom & Jerry

حبايب قلبى من جوه..اه والله توم وجيرى دول يا ناس ساكنين قلبى من جوه كده...هتقولولى يا كوكو طول بعرض بنضاره ولسه بتتفرجى على  الكارتون وتوم وجيرى كمان اللى بعد سن تلات سنين بتنتهى صلاحيته بالنسبه للطفل..اه وماله ايه المشكله واجهر كمان انى بعمل كده..مش أحسن من اللى بيتفرج على الكارتون فى السر بحجه ان فى عيال فى المكان  وهو دابب عينه وفاتح بقه ومبحلق اكتر من العيال..بس فعلا فى أفلام ليهم انا لو شفتها999 مره برضه فى المره ال1000 هشوفها وهضحك من قلبى ومش هزهق ابدا...عارفين فى حد مره قالى انتى مش انسان طبيعى انتى هربانه من فيلم كارتون...اوقات كده بتمنى ان الكرتون ده يبقى بجد والحياه بالبساطه دى وان انا فعلا مجرد افاتار او شخصيه فى كارتون فى عالم خيالى وسحرى..يعنى مثلا لو فكرنا ان  شخصيات الكارتون دى بجد..فأنا واثقه ان توم وجيرى بعد التصوير بيكونوا كويسين جدا مع بعض وأصحاب ..يعنى توم مثلا  يعزم جيرى مره على كنتاكى ويخمسوا على ساندويتش يروح جيرى المره اللى بعدها راددهاله وعازمه عند الحاج هارديز..ماهم امريكان بقى عايزنهم يا كلوا عند مؤمن والشبراوى وجاد مثلا.......وبعدين بقى بصراحه انا بشك ان جيرى بالتسويس اللى بيعمله ده ليه أصل مصرى..يعنى مش أمريكانى بيور صافى كده...حركات النداله اللى بيعملها دى ولا ولد صايع من اقل حته فيكى يا مصر يعملها...طب عارفين بجد أحلى وقت بيكون لما انسى كل همومى ومشاكلى واقعد اتفرج على توم وجيرى وانسى سنى واسيب الطفله اللى جوايا تنطلق....أضحك ضحكه بريئه....أقلد صوت الموسيقى التصويريه للكارتون....ابتسم من قلبى وانا مبسوطه بحركه نداله من جيرى او بوقليله فى راس توم..واكيد لما بابا بيعدى ويشوفنى كده بيضحك ويقول" لسه طفله " ايوه طفله ونفسى افضل طفله طول العمر...انام وانا فرحانه لان بابا جابلى شوكولا وهو جاى من بره...او اجرى ورا اخويا فى الشقه قبل ماينزل الصبح لشغله وابوسه بالعافيه واطلع اجرى لانه مش بيحب ان حد يبوسه او انط من ورا ماما واديها اكبر حضن فى الدنيا او اقول لبابا واسأله للمره الالف انت بتحبنى قد ايه ؟؟؟؟؟؟ يقولى بحبك بعمرى كله.. وانتى يا ماهى بتحبى بابى قد ايه؟؟؟؟؟؟أقوله بمنتهى البراءه وانا فارده ايدى ومغمضه عينتينى "بحبك قد البحر يا بابى"

انتى اشتغلى ايه؟؟؟

فاكرين مارى منيب فى مسرحيه(الا خمسه) لما كانت بتقول لعادل خيرى..انتى أشتغلى ايه؟؟؟كان يقولها سواق ياست هانم.....قرفته فى عيشته طول المسرحيه بنفس السؤال الغتيت ده....بجد السواقين دول أصحاب مزاج وخصوصا سواقين الميكروباص ومؤخرا سواقين التوك توك.....بجد يا جماعه انا بقرأ  حاجات مكتوبه على الميكروباصات منها التهييس..ومنها الحكم...يعنى من الحاجات الكتير اللى قرأتها مثلا.....لو شجره الصبر طرحت ودع يبقى لسه فى فالدنيا صاحب جدع.....متبصليش بعين رضيه بص للى اتدفع فيا....الحلوه خوخه جت بعد دوخه.....ياناس ياشر كفايه أررررررر.......للبيع(اكيد مش للبيع ده لسه العداد جايب اصفار بس هو خايف من الحسد) العين صابتنى ورب العرش نجانى.....وفى واحده كده بصراحه انا مش فكراها بس بتضحك جدا واخرها دى جايه بدهب المدام......ولا لما بيكتبوا  أسماء عيالهم على الميكروباصات......وكمان بيعملوا حركه أموت وأفهم ليه......بيعلقوا شبشب او جزمه بيبى من ورا.......وبجد يعنى اكتر حاجه بتضحكنى اكتر من المقولات نفسها هى الاخطاء الاملائيه فيها....شكل اللى كاتبها معاه شهاده نحو الأميه وفى الاخر دى ظاهره فى مجتمعنا...فى ناس هتقول دى ظاهره لطيفه ومضحكه...وناس تانيه هتقول دى ظاهره عشوائيه ...بس أنا شايفه ان فعلا فيها حاجات كويسه....وبمناسبه سواقين الميكروباص سمعنى احلى سلام شعبى بيقول انا مش عارفنى انا تهت منى انا مش انا وده بمناسبه الاغانى الحلزونيه القرمزيه البتنجانيه اللولبيه اللى بيشغلوها.

داحنا ناس جامدين يابنى

المصريين دول يا جدع ناس 100%.........معديين بجد ......تخيلوا ان الاوبرا الايطاليه ذات نفسها تنبأت بالثوره المصريه من كتر ما كانت مبهوره بالمصريين..............ايه مش مصدقين؟؟؟؟؟؟؟ ولا فاكرنى بهيس عليكم؟؟؟؟؟؟لا بجد فى اغنيه اوبراليه اتقال فيها ( سجن طره) يوووووووه برضه مش مصدقين؟؟؟ الاغنيه فوق عندكم لومش مصدقين اسمعوها وركزوا فى الكلام..هتلاقوا فى النص كلمه(سجن طره) ولعلمكم بتتكرر اكتر من مره كمان....أينعم انا مش فاهمه ولا حرف فى الاغنيه بس مره سمعت واحد بيقول الاوبرا غذاء..وأنا بصراحه كنت جعانه فسمعتها ...بس مشبعتش  روحت سامعه باقى المقوله لقيت الراجل بيقول الاوبرا غذاء الروح.....روح مين ياعم هو انا نيمت العصافير اللى بتصرخ فى بطنى علشان اغذى روحى.....بس بينى وبينكم من ساعه ما سمعت اغانى الاوبرا وانا بقيت بحبها جدا..صحيح انا مش فاهمه الكلام بس بتريح اعصابى..وهو يعنى اللى بيسمع اغانى انجليزى فاهم نص الكلام اللى بيتقال.....المهم سيبكم من الرغى ده كله واسمعول الاغنيه وركزوا فى الكلام وقولوا رأيكم.

هات حته

                                                                                      أنت ليه حتتك اكبر من حتتى؟؟؟؟؟؟ ماليش دعوه انا كمان عايز حته كبيره....هات حته من عندك !!!!!!!!!!!! بقولك يابنى هات  حته...ما أنت عندك كتير!!!!!!!!!!!!!!! هو دا حالنا على مر الزمان ..على طول بنتخانق ونشد مع بعض ....واللى بنتخانق عليه هو الوطن..الارض..الاصل..الجذور...كتير من الدول انفصلت واتقسمت على الرغم من كون تاريخها واحد..اصلها واحد..حضارتها واحده..وكان السبب فى اغلب الاحيان لعبه الاستعمار زى مثلا الهند لما بريطانيا سابتها وبطلت تستعمرها..تسيبها الست انجلترا حته واحده ازاى؟؟؟ لا عيب.. قسمتها للهند وباكستان ولعبت على جزئيه الاقليه المسلمه المتحدثه باللغه الارديه....وتسكت الست انجلترا على كده ؟؟؟؟؟؟لأ عيب...تروح مقسمه باكستان ..لباكستان وبنجلاديش...وعندك من الامثله دى كتير زى كوريا لما اتقسمت لكوريا الجنوبيه وكوريا الشماليه...والمانيا بعد الحرب العالميه التانيه لما فتتوها لشرقيه وغربيه وهى اصلا كانت بلد واحده هى والنمسا  وامريكا واللى عملته فى الاتحاد السوفيتى و لا جارتنا السودان اللى بقت شمال وجنوب وهى اصلا كانت حته مننا ...اه مصر والسودان كانت بلد واحده ايه متعرفوش؟؟؟؟؟؟؟ عمركم ماسمعتم لفظ ملك مصر والسودان؟؟؟؟؟؟؟؟؟؟؟ بس تفتكروا بعد الثورره وحوار الفتنه الطائفيه اللى مش داخل دماغى ده ممكن مصر تتقسم وتبقى الخريطه الجديده ان المسيحيين فى الشمال والمسلمين فى الجنوب والنص منطقه نزاع؟؟؟؟؟؟؟؟؟؟؟؟ والله انا شايفه ان احنا لسه موصلناش لمرحله الفتنه الطائفيه زى ما  ماما امريكا بتقول.....ده ماما امريكا دى أم العنصريه والتمييز العرقى..وقال ايه جايه تعلمنا حقوق الانسان والديمقراطيه...ياشيخه روحى اللعبى بعيد ده الفراعنه كتبوا على حيطان مقابرهم وصايا بكيفيه مراعاه الزوج لزوجته والابن لأمه ومعامله  الجار لجاره ولا كتاب الموتى اللى مليان روحانيات فى قمه الروعه.......بس على الرغم من كل ده لو فضلنا نتخانق ونقول هات حته...صدقونى مش هنتقسم احنا هنتفتت...كفايه بقى كل واحد يفكر ويقول انا ثم انا.

ذكريات الطفوله

سؤال يطرح نفسه....هو احنا ممكن العمر يقف بينا ومنكبرش؟؟؟؟؟؟؟؟ ممكن نفضل أطفال على طول؟؟؟؟؟؟؟؟أحلى حاجه فى الطفوله انك وانت طفل مش شايل هم أى حاجه ...تزعل فى لحظه وبونبونايه بالفراوله تخليك تضحك فى اللحظه اللى بعدها...ولا لما  تبرد بالليل كده والسرير يتبل...اه يتبل ايه عمرها محصلت يعنى؟؟؟؟؟؟؟؟؟؟؟؟ ومامتك تسألك مش عيب  ...احنا مش كبرنا على الحاجات دى..ترد بمنتهى البراءه وتقول أصل السرير  بيعرق يا ماما...و لما حد يتخانق مع اخوك الكبير فى المدرسه ويكون حاجه كده الله أكبر  واخده مساحه يعنى طول بعرض..وانت يا عينى قصير ومش طايل غير ركبته فتروح عضه فيها علشان يسيب أخوك الكبير...و لما ماماتك تسألك  لما ترجع البيت بعد اول يوم ليك فى المدرسه .ها  ايه أكتر حاجه عجبتك فى المدرسه؟؟؟؟ ترد بمنتهى الدهشه ان المدرسه كلها كانت مقلدانى ولابسه زيي........و لما  يكون عندك كرسى صغير بلاستيك من بتوع الاطفال وتصر تقعد على بتاع اخوك ..بلطجه  بقى وان كان عاجبه!!!!!!! ولا لما ترجع من المدرسه مبهدل وحالتك حاله ولا المتشردين وتروح رامى شنطتك جنب الباب وتهجم على الاكل ومامتك تقولك  ايه ده انا علمتك كده؟؟؟؟؟ اجرى على الحمام بسرعه.....و لما باباك يذاكرلك ويقولك دى غلط تروح باصصله بمنتهى التناحه وتقول الميس فالت كده................و لما تكون فى الفسحه ومفيش حد سلم منك عمال تلطش فى كل الاطفال الابرياء اللى فى المدرسه..و لما تكون باربى هى العروسه الاولى على مستوى العالم لكن عندك كرمبه هى نمره واحد ...ولا لما تستنى العيد من السنه للسنه علشان البمب والصواريخ اللى بتسرع بيهم الجيران....و أخر يوم امتحانات لما تبقى سعيد لدرجه انك ممكن ترش رشه جريئه وتعزم صحابك  كلهم على لوليتا..ولا لما تخلص الامتحانات قبل اخوك الكبير وتيجى جمبه وهو بيذاكر وتطلع لسانك وتقوله انا خلصت وانت لآ واكيد بتطلع تجرى بعدها لانه لو مسكك هيفرمك... و لما تروحوا المصيف ومامتك تقولك كفايه كده  أطلع من البحر وانت تعند لحد ما جسمك كله يتحرق من الشمس ويقشر .....و لما تروحوا عند ناس قرايبكم وتلاقى مامتك بتقولها يا حبيبتى دانتى  نسمه وزى الفراشه...تروح باصص لمامتك وتقولها  انتى مش لسه قايله على طنط حربايه واحنا جايين فى العربيه .هى طنط  فراشه ولا حربايه يا ماما؟؟؟؟؟؟؟؟؟يااااااااااااه انا لو كتبت من هنا لاخر عمرى مش هقدر اكتب ربع الذكريات دى..بس صدقونى لو أخترعوا اّلة زمن انا أول واحده هشتريها وبأى ثمن

لحظات

غمضوا عينيكوا وتخيلوا معايا اللحظات الجميله دى...........ندى الصبح يبل وشك وانت بتشم ورده وبتتفرج على النيل..... الشروق على شط فاضى فى اسكندريه وانت مشغل اغنيه لفيروز.....انك تجيب البخاخه بتاعت المكواه وتبل وشك وتحط بيكتول نعناع فى بقك وتقف قدام المروحه وتغمض عينيك......انك تاكل ايس كريم شوكولا ويعجبك وتنسى الدايت وتروح ضارب 4 كمان...انك تعمل قهوه على سبرتايه وتشربها مع كوبايه ميه مشبره..... انك تقف فى بلكونه بيتكم الساعه 3 الفجر والكل نايم وتفرد ايديك وتغمض عينيك وتاخد نفس كبير وتخرجه براحه او متخرجوش خالص وتخلص من هم الدنيا.....انك تشرب ليمون ساقع جدا فى الصيف وتحس بانتعاش رهيب.....انك تربع على السرير وتشغل التكييف وتمسك كتاب 700 صفحه لكاتب انت بتحبه وتخلص الكتاب فى ليله واحده..... انك لما تكون زعلان جدا تخلى محدش يعرف انك متضايق من كتر ما بتضحك وتهزر..يمكن علشان حاسس انك ممكن تنسى همك لما تشوف اللى حواليك مبسوطين..... انك تفتح شباك العربيه وانت سايق بالليل والهوا الساقع يلمس وشك.....دى شويه لحظات فى حياه اى حد فينا...بس لحظات ذات مذاق خاص.

معا نحو ضياع مصر

http://www.youtube.com/watch?v=HXWKsBQ8G2M

• بصوا بقى فى ناس بتقول انا هنتخب عمرو موسى لرئاسه الجمهوريه علشان عنده خبره فى السياسه من شغله فى جامعه الدول العربيه....وناس تانيه بتقول مفيش الا البرادعى  كان عايش طول عمره بره وهيرفع مستوى البحث العلمى ........وناس تانيين خالص بتوع أيمن نور يابلاش واحد غيره مينفعناش من منطلق كفايه عواجيز بقى عايزين دم جديد وحياه جديده بعد الثوره،انا بقى ليا رأيي الخاص.....اه ليا رأى مختلف حد عنده مشاكل؟؟؟؟؟؟؟؟؟؟؟؟؟ هو انا مش كائن حى هلامى اعيش واتعايش.........أنا بقى شايفه ان انسب حد يمسك البلد هى الانسه سوكا العبيطه.......حد بيقول سوكا مين؟؟؟؟؟؟ ايه لحقتوا تنسوا كيفى كده....طيب بلاش دى سوكا يتاعت خواجه فلس باع البرنيطه...وطبعا اكيد انا ليا حجتى وأسبابى فى اختيارها للرئاسه وهى كالتالى :1 : تشجيع الرياضه فى الطفوله خاصه رياضتها المفضله الا وهى حدف الطوب على الناس ..لانها بتقوى عضلات الدراعين وبتساعد على التركيز عند التصويب على الاهداف المتحركه .    : 2تنشيط السياحه من منطلق مبدأ لو مجبتش الفلوس اللى عليك هعملك سياحه فى المنطقه اى هسيحلك.   3 : تشجيع المنتجات  الوطنيه وخاصه صناعه البمب والصواريخ لزوم رمضان والعيد.   4 : زياده التصدير ..حيث يعتمد  فكرها الاقتصادى على اعاده تصدير المنتجات الصينى للصين مره اخرى وخساره فرق العمله فى عمليات المراجحه الثلاثيه.   5 : تضخيم ديون مصر للدول المتقدمه والبنك الدولى من خلال  السحب من الاحتياطيات الدوليه علشان توفر المطالب الفئويه للشعب.  6 : العمل على توطيد العلاقات مع الاصدقاء اليهود واعاده تصدير الغاز لهم وقطع العلاقات مع اعدائنا العرب.  7 : هتخلى كليه الطب تقبل من 50% والتجاره من 98% علشان حماده ابن عم محسن جارهم يعرف يدخل الطب علشان يتخرج يموت الناس واهو نضرب عصفورين بحجر ونخلص من أزمه السكان بالمره.    ان شاء الله البرنامج الانتخابى للقائده العظيمه سوكا هيكون موجود عن الوكلاء والممثلين فى سواقين التوك توك..وبمناسبه التوك توك والشمسيه بالمره سمعونى سلام جامد جدا لخطيبى المستقبلى القذافى.