الصمت المفاجىء

عارف الناس الصاخبين، المرحين، اللى صوتهم عالى، وضحكتهم من القلب ومع الناس القريبين لسانهم سابق تفكيرهم، وبيقولوا رأيهم فى أغلب الأوقات بمنتهى الصراحة دون مجاملات.. أكيد قابلت حد منهم فى يوم من الأيام أو حتى ممكن تكون إنت واحد منهم ، الناس دى فى العادة بيتكلموا وبيسألوا وبيهتموا طول الوقت وفجأه تلاقيهم إختفوا أو معاملتهم إتغيرت وبتبقى مش فاهم هما بيعملوا كده ليه، ببساطة حاجة من الأتنين حصلت ، يا أما إتجرحوا وإتهانوا فكرامتهم وجعتهم واختاروا إنهم يسكتوا ويفصلوا نفسهم عن العالم ويتغلبوا على الإكتئاب والخيبة اللى صابتهم فى صمت لإن من وجه نظرهم العتاب واللوم والنقاش مع الناس اللى وجعوهم عمره ما هيصلح روحهم اللى إتكسرت أو السيناريو التانى بقى إنهم بيهربوا علشان يخبوا مشاعرهم سواء كانت إعجاب او حب أو كره أو حتى نفور و إستهجان، لإنهم عارفين إنهم هيتفضحوا مع أول كلمة هيقولوها او رد فعل هيعملوه فبيستخبوا فى ركن بعيد هادى علشان يسيطروا على مشاعرهم وميبانوش ضعاف.. فى حالة إنك تعرف حد من النوعية دى من البشر خد بالك فى التعامل لإنهم حساسين جداً ولو عدولك إهانتك مره والتانية التالتة هتكون مقاطعة بدون سابق إنذار وساعتها مش هتقدر حتى تعرف منهم إنت عملت إيه زعلهم منك أما بقى لو إنت شخصياً واحد من النوعيه دى من البشر يبقى لازم تعرف إن مش كل الناس هتفهم إن صمتك وجع أو إحتقار أو حتى حب او إعجاب ...فى أوقات لازم تتكلم وتوضح إنت حاسس بإيه، لما تتهان إعترض ولما تتوجع قول آه من قلبك .. إحنا بشر ومن حقنا نكون ضعاف.. وأهم حاجه بقى لما تحب حد متبعدوش عنك علشان خايف، مش بقول قرب منه بس على الأقل متبعدوش عنك وإدى نفسك فرصة تقلل القيود اللى بتعذب نفسك بيها ...